Elorda turǵyndary vaktsina alý arqyly 2 bólmeli páter utyp alýy múmkin. Mundai jańalyqpen Nur-Sultan qalasynyń ákimi Altai Kólginov Instagram paraqshasynda bólisti, dep habarlaidy "Ult aqparat".
«Koronavirýstyń taralýyn boldyrmaý jáne vaktsinatsiia júrgizý boiynsha shtab otyrysyn ótkizdim. Óz orynbasarlaryma, basqarma basshylaryna jáne aýdan ákimderine jetekshilik etetin salalarda vaktsinatsiialaýdyń mańyzdylyǵy men qajettiligin joǵary deńgeide túsindirý úshin jekelegen jaýapkershilik júkteldi. Ujymdyq immýnitetti qalyptastyrý úshin qala halqynyń 60 paiyzdan astamy vaktsinatsiialanýy qajet. Sanitarlyq dárigerler karantindik qosymsha shekteýler týraly jańa qaýly daiyndaýda: qaýip-qater toby úshin vaktsinatsiia mindetti, vaktsinatsiialanbaǵan qyzmetkerlerdi qashyqtan jumys isteý rejimine kóshirý jáne taǵy basqa talap etiledi. Qala turǵyndaryn yntalandyrý úshin baǵaly syilyqtardyń utys oiynyn engizip jatyrmyz. Al jańadan vaktsinatsiialanǵandar arasynda eki bólmeli páter oinatpaqpyz (investorlar esebinen). Utys oiynyna qala emhanalarynda nemese SOO/SÚ pýnktterinde ekpe alǵan qala turǵyndarynyń bári qatysa alady», -dedi qala basshysy.
Onyń atap ótýinshe. páter utysynyń oiynyna osy jyldyń 25 maýsymy men 31 tamyzy aralyǵynda vaktsinanyń birinshi komponentin alatyn 18 jastan asqan qala turǵyndary qatysa alady. Qyrkúiek aiynyń basynda nátijesi jariialanady.
«Konkýrstyń ádil ótýi jáne vaktsinatsiialanǵandardy tolyǵymen qamtý úshin (kórsetilgen kezeńde) IT-qoǵamdastyqty jumyldyramyz. Aita keteiin, buǵan deiin «MEGA Silk Way» SOO vaktsinalanǵandar arasynda avtokólik utys oiyny ótetinin habarlaǵan. Sol siiaqty SOO/SÚ pýnktterinde vaktsinatsiialanǵandar arasynda kompiýterlik jáne turmystyq tehnikalardyń, iPhone smartfonynyń utys oiyndary oinatylady. Sońǵy kúnderi turǵyndardyń vaktsina alýdaǵy belsendiligi qýantady. Qala turǵyndary osylaisha óz densaýlyǵyna jaýapkershilikpen qarai bastady ári «Delta» shtammynyń qaýpin túsindi. Vaktsinatsiia – pandemiiamen kúrestegi jalǵyz, tiimdi ádis!», - dedi Altai Kólginov.
