Nur Otan partiiasynyń sailaýaldy baǵdarlamasyna sáikes taǵy 130 km sýmen jabdyqtaý jáne sý burý jelileri, 85 km nóser kárizi, qosalqy stansa men 177 km elektrmen jabdyqtaý jelileri, 23 km jylýmen jabdyqtaý jelileri, 3 keshen nóser kárizderin tazartý qurylystary salynady. Bul týraly Nur-Sultan qalasynyń ákimi Altai Kólginov Instagram paraqshasynda málim etti, dep habarlaidy elorda ákimdiginiń resmi saity.
«Qaladaǵy eldi mekenderdi aralaýdy jalǵastyramyz. Ózderińiz biletindei, bizde olardyń sany - 16. Onda turatyn halyqtyń sany - 300 myńǵa jýyq adam. Bul - elordanyń árbir tórtinshi turǵyny eldi mekende turady degen sóz.
Kóktal-1 eldi mekeni turǵyndarymen kezdestim. Atalǵan eldi mekende qordalanyp qalǵan birqatar máseleni sheshý jumystarymen ainalysyp jatyrmyz: jol salý, qoǵamdyq keńistikterdi abattandyrý, sý tartý, káriz salý, jaryqtandyrý jáne t. b. jumystar.
Kóktal-1 eldi mekeni turǵyndarymen kezdesýde eń birinshi kezekte atqarylýy qajet jumystar týraly áńgimelesip, pikir almastyq. Máselen, qalalyqtar jol, trotýar, skverler/býlvarlar, balalar men sport alańdaryn salý jáne jaryqtandyrý, t. b. máseleler týraly óz oilarymen bólisti. Aitylǵan máselelerdi nazarǵa alyp, osy eldi mekenniń aldaǵy damý josparyna engizemiz.
Mysaly, Kóktal-1 eldi mekenin tutastai gazben qamtamasyz ettik. Sonymen qatar biyl №40 mektep-litsei aýmaǵynda eki aýysymda 1 myń oryndy qamtityn taǵy bir oqý orny salyndy. Osylaisha mektepke túsetin júkteme azaiyp, jańa oqýshy oryndary ashylady. Soǵan qosa, osy eldi mekende qalalyqtardyń taza aýada salaýatty ómir saltyn saqtai otyryp, jaily jaǵdaida ýaqytyn paidaly ótkizýine múmkindik beretin taǵy 2 qoǵamdyq keńistik salamyz (Aqtolqyn kóshesi, Bastańǵy qiylysy).
Ótken jyly eldi mekende birinshi ret park salyndy. Onyń aýqymy - 15 ga. Salystyrmaly túrde aitar bolsaq, bul park bizdiń qalalyq parkten 2 ese úlken. Kóktaldaǵy jańa parkte basketbol, fýtbol alańdary men vorkaýt-aimaqtar, tynysh demalýǵa jáne itterdi serýendetýge arnalǵan aimaqtar bar.
Memleket basshysy eldi mekenderdi damytýǵa erekshe kóńil aýdarady. Sondyqtan barlyq eldi mekenderdi damytý baǵytynda jumys júrgizýdemiz.
Mysaly, byltyr shet aimaqtarda 100 kóshe, 345 km gaz taratý jelilerin saldyq. Úsh eldi meken turǵyndary gazǵa qosylýǵa múmkindik aldy. Jańa jylytý maýsymynda taǵy 7 eldi meken gazǵa kóshiriledi.
Buǵan qosa, 13,5 km injenerlik jeli, 5 km-den astam káriz jelisi jáne sý qubyryn tarttyq, 3 km-den astam nóser kárizderi salyndy. Ótken jyly 40 qoǵamdyq keńistikti bos jatqan tyń jerden jańadan saldyq: olar - parkter, skverler, býlvarlar. (Kóktal-1, Kóktal-2, Agrogorodok, Internatsionalnyi, Óndiris jáne t. b.).
Josparda taǵy 50 park pen skver salý, 120 km-den astam velosiped jolyn tóseý jáne t. b. jumystardy atqarý kózdelip otyr.
Óndiris, Kóktal, Ilinka, Jeleznodorojnyi eldi mekenderinde dene shynyqtyrý jáne saýyqtyrý keshenderiniń qurylysyn júrgizýdemiz. Ol oryndarda sportpen ainalysýǵa arnalǵan kabinetterden bólek, egde jastaǵy adamdardyń qyzyǵýshylyǵy boiynsha klýbtar, HQO, politsiia, poshta bólimsheleri jáne t. b. ornalastyrylatyn bolady. Atalǵan keshenderge turǵyndar tegin barady. Olardy biyl ashýdy josparlap otyrmyz.
Aldaǵy jyldary Nur Otan partiiasynyń sailaýaldy baǵdarlamasyna sáikes taǵy 130 km sýmen jabdyqtaý jáne sý burý jelilerin, 85 km nóser kárizin, qosalqy stansa men 177 km elektrmen jabdyqtaý jelilerin, 23 km jylýmen jabdyqtaý jelilerin, 3 keshen nóser kárizderin tazartý qurylystaryn salamyz.
Osylaisha, buǵan deiin aitqanymdai, bizdiń maqsatymyz – shet aimaqtardy shaǵyn aýdandarǵa ainaldyrý. Bul shaǵyn aýdandardyń taza aýada demalýǵa arnalǵan oryndary, áleýmettik nysandary, jaily ómir súrý úshin qolaily infraqurylymy jáne t. b. Bolady», - dep jazdy elorda ákimi.
