Nur-Sultan qalasynyń ákimi Altai Kólginov 6 shilde – Astana kúni qalai toilanatynyn aityp berdi, dep habarlaidy "Ult aqparat"
"Alda qala kúni. Qalada qandai mádeni is-sharalar uiymdastyrylady? Olar qandai formatta ótedi? Turǵyndar men qala qonaqtaryna arnalǵan otshashý bola ma?", - dep surady jýrnalister Ortalyq kommýnikatsiialar qyzmetiniń onlain-brifinginde.
«Árine, qala kúni – turǵyndar úshin erekshe kún. Adamdardyń toilaǵysy keledi, onyń ústine, kóptegen adamdar merekeni kútip júr. Biraq epidemiologiialyq jaǵdaiǵa bailanysty josparlarymyzdy ózgerttik. Jyl basynda josparlarymyz boldy, biraq qazir sanitarlyq dárigerlerdiń talaptaryn eskere otyryp, jabyq ǵimarattardaǵy barlyq sharalar onlain formatqa kóshýde, kóptegen is-sharalar toqtatyldy. Al kóshedegi sharalar áleýmettik qashyqtyq pen sanitarlyq talaptardy eskere otyryp ótkiziledi», - dedi Kólginov Ortalyq kommýnikatsiialar qyzmetinde ótken baspasóz máslihatynda.
Sonymen birge, ákim qala kúni áleýmettik baǵytta ótetinin atap ótti.
«Biz kóptegen úilerdi paidalanýǵa beremiz, kezekte turǵan 400 adam páter alady, zaǵip balalarǵa arnalǵan balabaqsha ashamyz, 20 kóppáterli turǵyn úidi úleskerlerge paidalanýǵa beremiz, qala shetterinde dene shynyqtyrý kesheni ashylady. Biz paida ákeletin naqty jobalarǵa nazar aýdarǵymyz keledi. Árine, adamdardy da qýantqymyz keledi, biraq is-sharalar qysqartyldy. Otshashý josparlanbaidy», - dedi.
Ákimdiktiń baspasóz qyzmetiniń málimetinshe, epidemiologiialyq jaǵdaidy eskere otyryp, elorda kúnine arnalǵan is-sharalar onlain formatta ótedi, al qalǵan bóligi ótpeidi.
Elordanyń bas memlekettik sanitariia dárigeri Sarhat Beisenovanyń qaýlysyna sáikes jabyq oryndar men kontsert zaldardaǵy is-sharalarǵa tyiym salynǵan. Sondai-aq ashyq aýadaǵy attraktsionnyń barlyq túriniń jumysyna tyiym salynady.
Tolymdylyǵy 20 paiyzdan aspaityn teatrlardyń, sondai-aq PTR-testteri bar jyljymaly kontsertterdiń jumysyna ǵana ruqsat etiledi.
Sol siiaqty Ashyq jobasy negizinde karantindik sharalardy qatań túrde saqtai otyryp, ashyq aýada ótetin is-sharalarǵa ruqsat etiledi.
Mysaly, 6 shilde kúni "MýzArt" onlain-kontserti josparlanǵan. Onlain-transliatsiia boiynsha barlyq aqparat Nur-Sultan qalasy Mádeniet basqarmasynyń Instagram jelisindegi @ns.madeniet paraqshasynda jariialanady.
Elorda kúnin merekeleý áleýmettik jobalarǵa arnalady jáne tek áleýmettik sipatta bolady. Naqtyraq aitqanda halyqtyń áleýmettik osal toptary arasynda kezekte turǵandarǵa baspana kiltin tabystaý, qurylysy uzaqqa sozylǵan 20-ǵa jýyq úidi aiaqtaý, Óndiris jáne Kóktal aýdandaryndaǵy iri dene shynyqtyrý-saýyqtyrý keshenderiniń qurylysyn aiaqtap, paidalanýǵa berý is-sharasy ótedi.
Sonymen qatar, kórý qabileti buzylǵan balalarǵa arnalǵan mamandandyrylǵan balabaqsha ashylady, 50-den astam aýlanyń, 10-ǵa jýyq qoǵamdyq keńistiktiń qurylysy aiaqtalady.
