Senat depýtatynyń saýalyna joldaǵan jaýabynda QR Premer-Ministri Álihan Smaiylov qoldanystaǵy kóp deńgeili zeinetaqy júiesin qaldyrý oryndy degen ustanym bildirdi, dep habarlaidy QazAqparat.
«2023 jyldan bastap jumys berýshiniń mindetti zeinetaqy jarnalaryn engizý bolashaqta zeinetaqy tólemderiniń mólsherin ulǵaitýǵa aitarlyqtai yqpal etedi. Álemdik tájiribe jáne bizdiń otandyq praktika (1999 jyly zeinetaqylar men járdemaqylar boiynsha boryshtar shamamen 39 mlrd teńgeni boldy) ártaraptandyrylǵan qarjylandyrý kózderi bar qazirgi kóp komponentti júieniń turaqtylyǵyn kórsetti. Bolashaqta jinaqtaýshy komponent zeinetaqy tólemderin qamtamasyz etetin júieniń negizgi deńgeiine ainalady», - dep jazylǵan jaýapta.
Premer-Ministrdiń deregi boiynsha, keiingi 10 jylda BJZQ zeinetaqy tólemderiniń ortasha mólsheri 10 ese, iaǵni 3 myńnan 30 myń teńgege deiin ósken.
«Búginde BJZQ-daǵy zeinetaqy jinaqtarynyń kólemi – 12,9 trln teńge. Al, belsendi salymshylardyń jeke zeinetaqy shottarynyń sany 9 millionǵa jetip qaldy. Sonymen qatar, memleket jyl saiynǵy infliatsiiany eskere otyryp, zeinetaqy jarnalarynyń saqtalýyna kepildik beretinin atap ótken jón. Ulttyq Bank 2014 jyldan beri zeinetaqy aktivterine senimgerlik basqarýdy júzege asyryp keledi. Osy aralyqta jinaqtalǵan infliatsiianyń shamasy 90,68% bolsa, zeinetaqy aktivteriniń jinaqtalǵan tabysy 104,45%-ǵa jetti. Nátijesinde memlekettik kepildik tólemderi 12,8 mlrd teńgeden 1,4 mlrd teńgege deiin tómendedi. Osy aitylǵandardy eskere otyryp, qoldanystaǵy kóp deńgeili zeinetaqy júiesin qaldyrý oryndy dep sanaimyz», - delingen Úkimet bashysynyń jaýabynda.
