2022 jyly Qazaqstannyń 6 qalasynda salynatyn qoqys órteý zaýyttarynyń jobalyq-smetalyq qujattamasy ázirlene bastaidy. Bul týraly QR Ekologiia, geologiia jáne tabiǵi resýrstar ministri Serikqali Brekeshev aitty, dep habarlaidy QazAqparat.
Ortalyq kommýnikatsiialar ortalyǵynda ótken brifingide Óskemen qoqys órteitin zaýyt salynatyn 6 qalanyń ishine kirgenine jergilikti halyqtyń nazary ekenin aitqan BAQ ókili «onsyz da ekologiiasy ýshyǵyp turǵan qalada mundai kúmándi joba nege iske asyrylyp jatqanyn» surady.
Serikqali Brekeshevtiń aitýynsha, atalǵan jobalardyń ziiandy nemese qaýipsiz ekenin aitýǵa áli erte.
Ol úshin áýeli qoǵam talqysynan ótip, keiin quzyrly organnyń saraptamasyn alýy kerek.
«Joba iske asyrardyń aldynda ekologiialyq saraptamadan ótedi. Oǵan deiin jobalyq-smetalyq qujattama kezeńinde qoǵamdyq tyńdaý uiymdastyrylady. Turǵyndar kókeidegi suraqtaryn sol kezde investorǵa qoia alady. Al investor nemese joba ákimshisi jobaǵa qatysty búkil aqparatty halyqtyń aldyna jaiyp salýy kerek. Qandai tehnologiia ornatylatynyn, qanshalyqty zamanaýi nemese «jasyl» talapqa sai ekenin túsindirýi kerek. Turǵyndar aitqan eskertýler men usynystar joba iske asyrylǵan kezde eskerilýi kerek», - degen ministr ázirge ministrliktiń qaraýyna bir de bir zaýyt jobasy túspegenin jetkizdi.
«Bizge alty qala boiynsha da eshbir joba áli túsken joq. Iske asyrý kezeńi kelesi jyly bastalady. Iaǵni, 2022 jyly jobalyq-smetalyq qujattama ázirleý bastalady. Ol qujat bizge túsýi kerek. Biz oǵan saraptama jasap, ekologiialyq ruqsat berý máselesin sheshemiz. Osy kezde Óskemende salynýy tiis zaýyttyń da ekologiialyq talapqai qanshalyqty sai ekenin qaraimyz. Jobalar bizdiń qolymyzǵa timei turyp, jergilikti halyqtyń arasynda talqylanyp, qoǵamdyq tyńdaýlar ótýi kerek. Investor ony ótkizýge mindetti. Iaǵni, qoqys órteitin zaýyttardyń qanshalyqty ziiandy nemese qaýipsiz ekenin ekologiialyq saraptama jasaǵannan keiin ǵana aita alamyn», - dedi vedomstvo basshysy.
