Kókshetaý qalasynda jylý elektr ortalyǵyn salýǵa qatysty tehnikalyq-ekonomikalyq negizdeme daiyn. Bul týraly óńir ákimi Ermek Marjyqpaev óńirdegi mal basy artqanyn málim etti, dep habarlaidy QazAqparat.
«Birazdan beri oblys ortalyǵyn sýmen qamtamasyz etý men elektr energiiasynyń generatsiiasy turǵyndardy alańdatyp otyr. Qala damyp keledi, shahar aýmaǵy keńeiip jatyr. Sonymen qatar biznes damyp, áleýmettik sala nysandary salynyp jatyr. Alaida bizde jylýmen qamtamasyz etý kózine bailanysty problema bar», - dedi ákim Ortalyq kommýnikatsiialar qyzmetinde.
Osy oraida ol 2014 jyly Kókshetaýda jylý elektr stansasyn salýǵa tehnikalyq-ekonomikalyq negizdeme tapsyrylyp, daiyndalǵanyn eske saldy.
«Konkýrs júrgizilip, 25-ten astam kompaniiadan ótinim kelip tústi. Olardyń arasynda sheteldik kompaniialar da boldy. Biraq konkýrsta jeńgen kompaniia ózine alǵan ókilettikti oryndai almady. Bizge Memleket basshysy jylý elektr ortalyǵyn salý boiynsha tikelei tapsyrma berdi. Sondyqtan Úkimetpen birlese otyryp, bul máseleni pysyqtap jatyrmyz. Ótken aptada jylý elektr ortalyǵynyń tehnikalyq-ekonomikalyq negizdemesin aldyq. Onda birshama parametr ózgerdi. Bul joba aitarlyqtai jetildirildi, zamanaýi tehnologiialarǵa qatysty eleýli jumys júrgizildi, iaǵna ekologiia baǵytyna ekpin qoiyldy», - dedi Ermek Marjyqpaev.
Osy oraida ákim JEO salynsa qaladaǵy ystyq sý máselesi de sheshiletinin aitty.
Onyń sózine qaraǵanda, jylýmen jabdyqtaý salasynda, ótken jyly jylý kózderi men jylý toraptaryn salý men rekonstrýktsiialaýdyń 9 jobasyn iske asyrý nátijesinde, 61 kópqabatty turǵyn úi, 454 jekemenshik úi, 31 áleýmettik obekt jylýǵa qosymsha qosyldy. Sonymen qatar, Aqkól (Aqkól q.), Astrahan, Býrabai, Ereimentaý, Bulandy, Tselinograd (Aqmol a.) aýdandarynda jáne Kókshetaý qalasynda shamamen 11 myń adam sapaly jylýmen qamtamasyz etildi.
«Aǵymdaǵy jyly jumys jalǵastyrylatyn bolady. Stepniak qalasy, Aqmol aýyly, Makinsk qalasy, Astrahanka aýyly jáne oblys ortalyǵynda qazandyqtar men jylý toraptaryn salyp jóndeýdi josparlap otyrmyz. Jalpy, 9 myń halyqty qamtý arqyly 10 joba bar», - dedi ákim.
