Foto: Zakon.kz
Qarjylyq monitoring agenttiginiń habarlaýynsha, Kókshetaý qalasynda agroónerkásip kesheni sýbektilerine berilgen memlekettik sýbsidiialardy zańsyz alǵandar sottaldy, dep habarlaidy Ult.kz.
"MolProdJarkain" ÁKK direktory men "Rassvet" sharýa qojalyǵynyń basshysy eki jyl boiy sút jáne ony tereń óńdeýge arnalǵan sýbsidiialardy zańsyz alǵan.
Agenttik málimetinshe, "Rassvet" sharýa qojalyǵynda sýbsidiia talaptaryna sáikes sút óndirýge jetkilikti mal basy bolmaǵan. Degenmen, aqparattyq júiede "MolProdJarkain" ÁKK-ne 3 mln kg-nan astam shiki sút jetkizilgeni týraly jalǵan elektrondy shot-faktýralar rásimdelgen.
Osy qujattar negizinde sútti sary mai jáne qatty irimshikke óńdeý týraly esepter jasalyp, ýákiletti organ ótinimderdi maquldaǵan soń qarajat kásiporynnyń esepshotyna aýdarylǵan. Memleketke keltirilgen jalpy zalal – 152 mln teńge.
Agenttik atap ótkendei, alynǵan sýbsidiialardyń bir bóligi sottalýshylardyń biriniń týysynyń depozittik shotyna aýdarylyp, keiin oǵan mobildi ǵimarat satyp alynǵan.
Tergeý barysynda 6 jer ýchaskesine, 4 páterge, 11 avtokólikke, mobildi ǵimaratqa jáne óndiristik nysanǵa tyiym salyndy.
Sot úkimi boiynsha eki sottalýshy 6 jyl 4 aiǵa bas bostandyǵynan aiyryldy. Mobildi ǵimarat memleket kirisine tárkilendi. Qalǵan múlikke salynǵan tyiym azamattyq talap tolyq oryndalǵanǵa deiin saqtalady.
Úkim zańdy kúshine endi.
