Foto: Egemen.kz
Kókshetaý qalasynda agroónerkásip kesheni sýbektilerine bólingen memlekettik qarajatty asa iri mólsherde jymqyrý jáne qylmystyq jolmen alynǵan aqshany zańdastyrý isi boiynsha sot úkimi shyqty, dep habarlaidy Ult.kz.
Qarjylyq monitoring agenttiginiń (QMA) Aqmola oblysy boiynsha departamenti júrgizgen tergeý amaldary eki jyl boiy jalǵasqan qylmystyq shemanyń betin ashty.
Tergeý málimetterine sáikes, «MolProdJarkain» ÁKK direktory A.S. Efimkina men «Rassvet» sharýa qojalyǵynyń basshysy A.V. Maslov sút óndirisin arzandatýǵa baǵyttalǵan memlekettik sýbsidiialardy zańsyz iemdenip kelgen.
Qylmystyq jospar boiynsha, «Rassvet» sharýa qojalyǵynda málimdelgen kólemde sút óndirýge jetetin mal basy bolmasa da, qujat júzinde bári «túgel» dep kórsetilgen. Olar elektrondyq shot-faktýralar júiesinde 3 mln kg-nan astam shiki sút jetkizilgeni týraly jalǵan málimetter engizgen. Keiin osy «ótirik sútten» sary mai men qatty irimshik daiyndaldy degen jalǵan esepter negizinde memleketten qomaqty qarajat alyp otyrǵan.
Qylmystyq is-áreketter saldarynan memleketke keltirilgen jalpy shyǵyn 152 mln teńgeni qurady.
Ustalǵandar urlanǵan qarajattyń izin jasyrý úshin ony jylystatýmen de ainalysqan. Efimkina sýbsidiianyń bir bóligin týysynyń depozittik shotyna aýdaryp, keiin sol aqshaǵa mobildi ǵimarat satyp alǵan. Bul nysandy jalǵa berip, qosymsha tabys taýyp kelgeni anyqtaldy.
Tergeý barysynda kúdiktilerdiń qylmystyq jolmen tapqan múlkine jappai tyiym salyndy. Olardyń ishinde 6 jer ýchaskesi, 4 páter, 11 avtokólik, óndiristik nysan men mobildi ǵimarat bar.
Sot sheshimimen A.V. Maslov pen A.S. Efimkina kináli dep tanylyp, árqaisysy 6 jyl 4 aiǵa bas bostandyǵynan aiyryldy. Qylmystyq jolmen alynǵan qarajatqa alynǵan mobildi ǵimarat memleket menshigine tárkilendi.
Qalǵan múlikke salynǵan tyiym memleketke keltirilgen 152 mln teńge shyǵyn tolyq ótelgenge deiin kúshinde qalady. Úkim zańdy kúshine endi.
