Koronavirýs indeti kezinde Densaýlyq saqtaý ministrligi men Aqparat jáne qoǵamdyq damý ministrliginiń birikken jumysynyń arqasynda qurylǵan qoǵamdyq baqylaý uiymy áleýmettik shielenistiń aldyn aldy. Osyndai oiymen Qoǵamdyq baqylaýdyń Almatydaǵy úilestirýshisi Saida Táýkeleva bólisti, dep habarlaidy QazAqparat.
Onyń aitýynsha, qoǵamdyq baqylaý koronavirýs indeti beleń alǵan maýsym- shilde ailaryndaǵy qoǵamnyń ashyq saýaldaryna jaýap alý qajettiliginen týǵan.
Qalyń kópshiliktiń dári jetispeýshiligi, aýrýhanalardaǵy qiyndyqtar, oryn tapshylyǵy týraly ashynǵan oilary osy institýttyń qurylýyna túrtki boldy. Qurylǵanyna 1 aidan asa ýaqyt bolǵan qoǵamdyq uiym qazir Qazaqstannyń barlyq qalalarynda jumys istep jatyr.
Ár qaladaǵy úilestirýshide 4 monitoring toby jumys isteidi. Olar dárihana, meditsinalyq mekeme, aýrýhana men emhanany tekseredi. Gýmanitarlyq kómektiń tiisti orynǵa jetýin qadaǵalaidy. Sonymen qatar, sanitariia talaptarynyń saqtalýyn baqylaidy.
«Almaty ǵana emes, aimaqtarda da birqatar quqyqbuzýshylyq tirkeldi. Úilestirýshiler jergilikti ózin-ózi basqarý organdarymen, «SQ Farmatsiia» ókilderimen bailanysta. Eger, kez-kelgen uiymnyń jumysynan olqylyq anyqtalsa, uiym basshylarymen áńgime júrgiziledi. Bizdiń jumysymyzǵa sybailas jemqorlyqqa qarsy is qimyl agenttiginiń ókilderi de belsene qatysady. Biz eń aldymen oblystyq nemese qalalyq densaýlyq saqtaý uiymdarynan málimet alamyz. Sosyn, sol tizimmen meditsinalyq preparattardyń jetkizilýin tekseremiz», - dedi Saida Táýkeleva.
Onyń paiymdaýynsha, qoǵamdyq baqylaýdyń qurylýy Qazaqstanda volonterlik qozǵalystyń damýyna tyń serpin berdi.
Munda qoǵamdyq uiymdardaǵy barlyq volonterlik birlestikterdiń kúshi bir arnaǵa toǵysqan.
«Bizdiń aramyzda lider komandasy, ulttyq volonterler jelisi bar. Bizdiń basty mindetimiz - atqarylyp jatqan jumystardyń ashyqtyǵyn qamtamasyz etý. Bul jerde retteýshi organdar QR DSM men QR Aqparat jáne qoǵamdyq damý ministrligin atap ótý kerek. Olardyń qatysýymen kóptegen organdarǵa kirip, tekserýge múmkindik aldyq. Sonymen qatar, materialdardy kópshilikke jariia etýge múmkindik aldyq. Úsh jaqtap istelgen jumystyń arqasynda arada dialog bar. Ár reidten keiin biz akt toltyryp, retteýshi organ nemese jergiliktiózin ózibasqarý organy arqyly olqylyqty túzetýge kúsh jumsaimyz», - dedi ol.
Atqarylǵan jumystyń oń yqpal bergeni ras. Qazir burynǵydai dárihanalarǵa tizilgen kezek joq. Aýrýhanalar men emhanalar dárimen tolyq qamtylǵan. MÁMS tarapynan kepildendirilgen kómek berilip jatyr.
«Meniń oiymsha, bul buryn-sońdy bolmaǵan oqiǵa. Az ýaqytta qoǵam memleketpen birige otyryp kópshilikke jariia ári ashyq suhbatqa qol jetkizdi. Sonymen qatar, tekserý nátijeleri kópshiliktiń nazarynda bolǵany úlken jeńis dep oilaimyn», - dedi S.Táýkeleva.
Az ýaqytta pármendi kúshke ainalǵan qoǵamdyq baqylaýǵa qazir elimizdiń kez kelgen óńirinen turǵyndar júginedi.
«Qoǵamdyq baqylaý halyq pen memlekettik qurylymdar arasyndaǵy aqparattyq kópir bolyp otyr desem artyq emes. Bizdiń jumysymyz jazalaýdy maqsat etpeidi. Meditsina qyzmetkerleri qandai qiyndyqty bastan keshirip jatyr? Patsientterdiń kókeikesti problemalary nede? Osy suraqtarǵa jaýap izdeimiz. Qoǵamdyq baqylaýdyń arqasynda indettiń beleń alǵan kezinde týyndaǵan áleýmettik shielenis óz sheshimin tapty», - dedi Saida Táýkeleva.
