COVID-19 aýrýyna qarsy «dári» retinde Kóbeituz kóliniń tuzynyń kelisi áleýmettik jelide 5 myń teńgeden satylyp jatyr, dep habarlaidy "Ult aqparat".
«Kóbeituzdyń tuzyn satamyn. Kelisi – bes myń teńge. Kóptegen aýrýǵa em. Koronavirýs pen ish ótý jaǵdaiynda kómektesedi. Tamaqty shaiyp, asqa qosýǵa bolady. Tuzdy vannaǵa da jaqsy. Pikirge qaldyryńyz. Ózimiz sizge jazamyz. On shelek qana qaldy», - delingen jelidegi paraqshalardyń birindegi habarlamada.
Eske sala ketsek buǵan deiin Ekologiia, geologiia jáne tabiǵi resýrstar ministrligi Kóbeituzdyń lastanyp, ol jaqtan tuzdyń tielip áketilýine bailanysty alańdaýshylyq bildirgen bolatyn.
«Jańa ǵana biz Kóbeituz kóline keldik. QR EGTRM Ekologiia, geologiia jáne tabiǵi resýrstar komitetiniń tóraǵasy Zulfyhar Joldasov bastaǵan ministrliktiń mamandarynan quralǵan top qajetti jumystardy atqaryp jatyr. Tiisti sharalar qabyldanýda. Sonymen birge ekologtar sýdyń sapasy tekserý úshin synamasyn aldy», - dep jazdy áleýmettik jelide ministrliktiń baspasóz hatshysy.
