Ekologiia, geologiia jáne tabiǵi resýrstar ministri Maǵzum Myrzaǵaliev Aqmola oblysyndaǵy Kóbeituz kóline erekshe qorǵalatyn aýmaq mártebesin berýdi usyndy, dep habarlaidy QazAqparat.
«Sońǵy ailarda tirkelgen jaǵdailar qysqa ýaqyttyń ishinde tumsa tabiǵattyń kórkin qalaisha qurtýǵa bolatynyn aiqyn kórsetip berdi. Bul - erekshe biregei kól. Álbette, mobildi beketter men shlagbaýmmen problema sheshile salmaidy. Sebebi shlagbaým bar jerde ony attap ótkisi keletinder de kóp bolady», - dedi Maǵzum Myrzaǵaliev OKQ-da ótken baspasóz máslihatynda.
Ministrdiń aitýynsha, problemany sheshýdiń eki joly bar.
«Birinshisi – ekologiialyq bilim jáne aiyppul mólsherin kóbeitý. Ekinshisi – kóldiń biregeiligin paidalana otyryp, biz oǵan erekshe qorǵalatyn tabiǵa aýmaq mártebesin bersek deimiz. Osylaisha oǵan qatysty shekteý sharalary kúshine enedi», - dedi Maǵzum Myrzaǵaliev.
Eske sala ketsek buǵan deiin Ekologiia, geologiia jáne tabiǵi resýrstar ministrligi Kóbeituzdyń lastanyp, ol jaqtan tuzdyń tielip áketilýine bailanysty alańdaýshylyq bildirgen bolatyn. Buǵan halyqtyń kólge kóptep kelip, tuzyn qazyp, mańaiyn qaldyqqa toltyryp ketýi sebep bolǵan. Tipti áleýmettik jelide Kóbeituzdyń tuzyn kelisin bes myń teńgege satqandar da paida boldy.
Ókinishtisi, kólge barǵanymen tártip saqtamai, sýǵa kóligimen kirip ketkender de kezdesti. Keiin Aqmola oblysynyń politseileri kóligimen kólge kirip ketken adamnyń tabylyp, jazalanǵanyn habarlady.
