Foto: Qorǵanys ministrligi
Bas prokýratýra Oqý-aǵartý ministrliginen kámeletke tolmaǵandarmen tárbie jumysyn kúsheitý boiynsha sharalar qabyldaýdy talap etti, dep habarlaidy Ult.kz.
Vedomstva ministrlikti tekserý barysynda balalardyń quqyqtaryn qorǵaý tetikteriniń júieli kemshilikterin – «qiyn balalarmen» jumys jasalmaýyn, keshki jáne arnaiy mektepter, psihologtar, qorǵanshylyq organdary júiesiniń tiimsizdigin, kóptegen vedomstvolyq baǵynysty uiymdardyń profilaktika salasyndaǵy nashar jumysyn anyqtaǵan.
Sońǵy 3 jyl ishinde elimizde jasóspirimder qylmysy kúrt kóbeigen.
Bas prokýratýra aqparatyna súiensek, óńirlerde úlgerimi nashar jáne zańdy buzǵan oqýshylardy keshki mektepterge májbúrlep aýystyrý tájiribesi áli kúnge deiin saqtalǵan, keshki mektepterdiń materialdyq-tehnikalyq jaraqtandyrýy álsiz, pedagogikalyq quramy jinaqtalmaǵan, onda profilaktikalyq jumystar júrgizilmeidi. Elimizde barlyǵy 63 keshki mektep jumys isteidi, onyń kontingentiniń jartysynan kóbi kámeletke tolmaǵandarǵa tiesili (4300).
"Jyl sońyna deiin deviantty minez-qulqy bar balalardy «jaǵymdy ortaǵa» beiimdeý boiynsha jobany iske asyrý (bedeldi tálimgerlerdi bekitý, kadet synyptaryna jáne «Jas sarbaz» áskeri-patriottyq qozǵalysy, Ulttyq ulannyń «Jas búrkit» klýbtaryna ornalastyrý), ishki ister organdarynyń esebinde turǵan kámeletke tolmaǵandardy qosymsha bilimmen qamtý maqsatynda olarǵa tekserý júrgizý josparlanýda", - delingen habarlamada.
Tekserý nátijeleri boiynsha kináli laýazymdy tulǵalar, onyń ishinde Oqý-aǵartý ministrliginiń bólimshe basshylary tártiptik jaýapkershilikke tartylǵan.
