Almaty ákimi Baqytjan Saǵyntaev abattandyrý jumysy júrip jatqan Kishi Almaty ózeni boiyndaǵy jaiaý júrginshi aimaǵyn tekserdi, dep habarlaidy "Ult aqparat".
Almaty ákimi óziniń Instagram akkaýntynda jaiaý júrginshi jolyndaǵy negizgi ózgerister týraly aitty.
«Terrenkýr jaiqalyp keledi. Uzyndyǵy 9 shaqyrymdai bolatyn jaiaý júrginshiler jolynyń abattandyrý jumysy aiaqtalýǵa jaqyn. Ne isteldi? Eń aldymen, 5 myńǵa jýyq butaly ósimdik otyrǵyzylyp, jasyl qor retke keltirildi. Onyń betkeidi nyǵaityp, jaǵalaýdyń qulaýyna jol bermesi anyq. Álbette, jasyl aimaq aǵzanyń qalpyna kelýine yqpal etetin arnaiy mikroklimatty saqtaidy. Terrenkýrdyń emdik maqsatta salynǵany beker emes», - dep jazdy Almaty ákimi.
Onyń aitýynsha, ekinshiden, arnalar retke keltirilip, ol jer tunba men qumnan tazartyldy. Gabion konstrýktsiialary nyǵaitylyp, qalpyna keltirildi. Maqataev kóshesindegi kópir qaita jóndeýden ótip, gidrotehnikalyq qurylys jańartyldy.
Bul – Kishi Almaty ózeniniń ótkizý múmkindigin minýtyna 0,5 tekshe metrden 2,5 tekshe metrge deiin ulǵaitty.
Eki metrlik jerler barynsha úsh metrge deiin keńeitilip, asfalt aýystyryldy.
«Qala turǵyndaryna yńǵaily bolý úshin oryndyqtar jańartylyp, teńiz deńgeiiniń biiktigin kórsetetin navigatsiialyq stendter men aqparattyq stellalar qoiyldy. Budan ózge ál-Farabi dańǵylynyń astyndaǵy týnnel abattandyrylyp, Oqýshylar saraiy ǵimaratynyń artyna baqylaý alańy salyndy. Keńistiktiń úilesimdiligi men tutastyǵyn saqtaý úshin barlyq jerde aǵash paidalanyldy», - dep atap ótti Baóytjan Saǵyntaev.
Abattandyrý jumystary aiaqtalýda. Sanitarlyq torapty qosý, balalar alańdaryn jasaý, jekelegen ýchaskelerdi abattandyrý ǵana qaldy.
Jumys sapary kezinde qala ákimi «Qazaqstan» qonaq úiiniń artyndaǵy Dostyq skverin abattandyrý jáne Abai atyndaǵy QazUAOBT janyndaǵy skverdiń tarihi kelbetin qalpyna keltirý jumysynyń nátijesin kórdi.
Sonymen qatar, qala basshysy fontandy rekonstrýktsiialaý jáne Á. Qasteev atyndaǵy Memlekettik mýzei aýmaǵyn abattandyrý jónindegi jumystardyń bastalýymen tanysty.
