Foto:atpress.kz
Atyraý oblysy ákiminiń burynǵy orynbasary Baqytgúl Hamenovaǵa taǵaiyndalǵan jaza ózgertildi. Endi onyń 7 jyldyq bas bostandyǵynan aiyrý jazasy bas bostandyǵyn shekteý jazasyna aýystyryldy, dep habarlaidy Ult.kz.
Jergilikti basylymnyń málimetinshe, sottalǵan tulǵaǵa berilgen jazany óteýdi keiinge qaldyrý merzimi 10 naýryzda aiaqtalǵan. Osydan keiin Atyraý qalasynyń №2 soty 16 naýryz kúni probatsiia qyzmetiniń usynysyn qaraǵan.
Sot barysynda Hamenovanyń osy ýaqyt ishinde qoǵamdyq tártipti buzbaǵany, ákimshilik jaýapkershilikke tartylmaǵany jáne bala tárbiesine qatysty mindetterin oryndaǵany eskerildi. Nátijesinde sot ótelmegen jaza merzimin 7 jylǵa bas bostandyǵyn shekteý túrine aýystyryp, oǵan probatsiialyq baqylaý belgiledi.
Eske salsaq, 2022 jylǵy 15 qarashada sot Baqytgúl Hamenovany Qylmystyq kodekstiń 366-baby 3-bóligi 2-tarmaǵy boiynsha kináli dep tanyp, 7 jylǵa bas bostandyǵynan aiyrǵan bolatyn. Sonymen qatar oǵan memlekettik qyzmette ómir boiy jumys isteýge tyiym salynǵan.
Jazany óteý merzimi onyń kámeletke tolmaǵan balasynyń bolýyna bailanysty úsh jylǵa keiinge qaldyrylǵan edi.
Is materialdaryna sáikes, para kólemi 4,5 mln teńgeni quraǵan. Qarajat Abai Qunanbaevqa eskertkish ornatý jobasyna bailanysty alynǵan. Sot sondai-aq múlikti tárkileý týraly sheshim shyǵarǵan.
Aita keteiik, Hamenova kinásin moiyndamaǵanymen, sot úkimi ózgerissiz qalǵan.
Buǵan deiin áleýmettik jelilerde onyń saltanatty sharaǵa qatysqany týraly beine taraǵan. Bas prokýratýra bul jaǵdai boiynsha zań buzýshylyq anyqtalmaǵanyn jáne oǵan probatsiia qyzmeti tarapynan ruqsat berilgenin málimdedi.
