Foto: JI
Májilis keibir zańnamalyq aktilerge mádeniet jáne bilim berý máseleleri boiynsha engiziletin ózgerister men tolyqtyrýlardy birinshi oqylymda maquldady. Zań jobasyna depýtattar bastamashy boldy, dep habarlaidy Ult.kz.
Zań jobasy aiasynda halyqaralyq ǵylymi jobalar konkýrstarynyń jeńimpazdary men júldegerlerine, olardy daiyndaǵan pedagogtarǵa birjolǵy tólem qarastyrylady. Buryn mundai tólemderdi tek halyqaralyq pándik olimpiadalardyń jeńimpazdary ǵana alatyn.
"Bul norma daryndy balalar men olardyń muǵalimderin qoldaýǵa baǵyttalǵan. Onyń qajettiligi jaily Prezident Qasym-Jomart Toqaev 2024 jylǵy qazanda máslihat depýtattarynyń forýmynda aitqan bolatyn. Osy sanattaǵy oqýshylarǵa tólenetin eń joǵary tólem 1500 AEK nemese 6 million teńge shamasynda bolýy múmkin", - delingen habarlamada.
Sonymen qatar túzetýlerde mektep jasyndaǵy balalarǵa mádeni is-sharalarǵa qatysý úshin beriletin «Aqylman kartasy» jobasyn engizý qarastyrylǵan. Mektep jasyndaǵy balalarǵa abonement jergilikti ókildi organdardyń sheshimimen beriledi.
