Dúniejúzilik bank 10 jeltoqsanda donorlardyń Aýǵanstandaǵy gýmanitarlyq daǵdarysty eńserý úshin BUU-nyń eki baǵdarlamasy arqyly 280 mln dollar kóleminde kómek kórsetý týraly sheshim qabyldaǵanyn habarlady.
Aqparatqa qaraǵanda, BUU-nyń eki baǵdarlamasy: IýNISEF jáne Dúniejúzilik azyq-túlik baǵdarlamasyna Aýǵanstandy qalpyna keltirý senim qorynan (ARTF) jyl sońyna deiin qarajat túsedi.
Dúniejúzilik bank habarlamasynda "Bul osyndai kúrdeli kezeńde Aýǵanstandy qalpyna keltirý qoryndaǵy aqshany aýǵan halqyna gýmanitarlyq kómek kórsetý úshin jumsaýǵa baǵyttalǵan qadamdardyń basy" dep atap ótti.
Dúniejúzilik azyq-túlik baǵdarlamasynyń sharalaryna – 180 mln dollar, al densaýlyq saqtaý qyzmetimen qamtamasyz etetin IýNISEF-ke 100 mln dollar bólinedi. Qarajat ekonomikalyq jáne gýmanitarlyq daǵdarysqa ushyraǵan Aýǵanstanda azyq-túlik qaýipsizdigi men densaýlyq saqtaý salasyndaǵy negizgi máselelerdi sheshýge kómektesýi tiis.
Osyǵan deiin BUU Aýǵanstanda 23 mln adam – halyqtyń 55 paiyzyna ashtyq qaýpi tóndi dep alańdaýshylyq bildirgen.
