Foto: QR ǴJBM
Ál-Farabi atyndaǵy Qazaq ulttyq ýniversitetiniń aǵa oqytýshysy, jas ǵalym Aijamal Baiseiitova tsikorii ósimdiginiń qasietin jan-jaqty zerttep, onyń diabetke qarsy tiimdi áseri bar ekenin ǵylymi turǵyda dáleldedi, dep habarlaidy Ult.kz.
Zertteý barysynda tsikorii quramyndaǵy biologiialyq belsendi zattardyń qandaǵy qant deńgeiin tómendetýge, sondai-aq zat almasý protsesin retteýge oń yqpal etetini anyqtaldy. Sonymen qatar adam aǵzasynda stress áserinen paida bolatyn radikaldarǵa qarsy antioksidanttyq belsendiligi bar ekenin de dáleldedi. Bul ósimdiktiń densaýlyqty nyǵaitýdaǵy áleýeti joǵary ekenin kórsetedi.
Ǵalymnyń aitýynsha, qazirgi tańda atalǵan ǵylymi joba aiasynda halyqaralyq ǵylymi jýrnaldarda eki maqala jariialanǵan.
«Bizdiń maqsatymyz – emdik qasieti bar ósimdikter arqyly adam aǵzasynda jii kezdesetin aýrýlarǵa qarsy biologiialyq belsendi qospalar ázirleý. Qazirgi ýaqytta tsikorii ósimdiginiń fitohimiialyq jáne farmakologiialyq qasietterin zerttep jatyrmyz. Búginge deiin onyń diabetke jáne streske qarsy belsendiligi anyqtaldy. Aldaǵy ýaqytta virýstar men bakteriialarǵa, sonyń ishinde tumaý aýrýyna qarsy áserin zertteýdi josparlap otyrmyz», – deidi jas ǵalym.
Atalǵan innovatsiialyq joba boiynsha QazUÝ ǵalymdary patent alǵan. Bolashaqta tsikorii negizinde daiyndalǵan ónimder biologiialyq belsendi qospa jáne emdik shai retinde óndirilip, otandyq naryqqa shyǵarý kózdeledi.
Aijamal Baiseiitova ál-Farabi atyndaǵy QazUÝ-dyń Himiia jáne himiialyq tehnologiia fakýltetinde dáris beredi. Sonymen qatar ýniversitet janyndaǵy Dárilik ósimdikterdi ǵylymi-zertteý ortalyǵynda qyzmet atqarady. Ol Ońtústik Koreiadaǵy Kionsan ulttyq ýniversitetinde magistratýra men doktorantýrada bilim alyp, doktorlyq dárejesin sátti qorǵaǵan.
