Qazaq ulttyq agrarlyq ýniversitetiniń ǵalymdary koronavirýsqa qarsy vaktsina jasaý isin qolǵa aldy. Bul týraly atalǵan ýniversitettiń professory Qaisar Tabynov aitty, dep habarlaidy QazAqparat.
«Dúniejúzilik densaýlyq saqtaý uiymynyń málimetine sáikes, 20 sáýirde 76 vaktsina usynylǵan. Olardyń ishinde tek beseýi ǵana klinikalyq synaqtyń 1-2 fazasy satysynda tur. 71 vaktsina qosymsha synaqtan ótkizilip jatyr. Al Qazaqstanda eki institýt 4 vaktsina usynǵan. Ekeýi - rekombinantty aqýyz, sonymen qatar alfa-virýs negizdi 2 vektorly vaktsina. Qazaq ulttyq agrarlyq ýniversiteti de óz baǵdarlamasyn usynyp otyr. Qazirgi ýaqytta múddeli barlyq adamdarda bir platformaǵa toptastyryp, naqty baǵdarlama usynatyn bolamyz. Birneshe vaktsina usynǵymyz keledi. Onyń biri - intranazaldy qoldanýǵa arnalǵan nano-vaktsina», - dedi ol Facebook-te Young researchers alliance paraqshasynda «COVID-19: Ańyz álde aqiqat» taqyryndaǵy tikelei efir barysynda.
Onyń atap ótýinshe, qazirgi ýaqytta aldaǵy úsh jyldyń ishinde kandidatty vaktsina alý josparlanyp otyr. Al úshinshi jylyna klinikalyq synaqtar ótkizilip, sodan keiin vaktsina ázirleýge qarjy izdeý jumystary qolǵa alynady.
«Qazirdiń ózinde vaktsina ázirlegenimizben ony óndiretin jáne halyqtyń 70 paiyzyn qamtamasyz etetin biofarmatsevtikalyq zaýytymyz joq. Jalpy, vaktsina eń aldymen táýekel tobyna kiretin adamdar sanatyna arnalatyn bolady. Joǵaryda ataǵan klinikalyq synaq satysyndaǵy 5 kandidatty vaktsina Qytaida jasalyp jatyr. Sebebi Qytai indetpen eń birinshi betpe-bet keldi jáne olar vaktsina ázirleýdi barlyq elderden buryn bastady. Menińshe, eń tiimdisi - inaktivtelgen vaktsina. Munyń barlyǵy Qytaida jasalyp jatyr», - dedi ǵalym.
