Qazaqstan týristik qaýymdastyǵy Alakólmen shipajai kýrortty oryndarǵa týrister aǵyny artatynyn boljap otyr, dep habarlaidy QazAqparat.
«Koronavirýsqa qatysty ahýal bizdiń ahýalǵa da áserin tigizbei qoiǵan joq. Biz epidahýaldyń saldaryn 2019 jyldyń jeltoqsanynda-aq sezine bastadyq. Týristik salada shaǵyn jáne orta biznes basym ekeni bárine málim. Qazir týristik sala qairańdap qalǵanyn joǵary deńgeide túsinip otyr», - dedi onlain baspasóz máslihaty kezinde QR Týristik qaýymdastyǵynyń direktory Rashida Shaikenova.
Onyń aitýynsha, qazir osyndai aýyr kúnderdi álemniń týristik indýstriiasy basynan keshirip jatyr.
«Qazir tek ishki týrizm ǵana jandanady degen úmit bar. Sebebi, karantinnen zerikken adamdar Qazaqstan óz ishinde saiahattaýdy uiǵarady dep úmittenemiz. Alaida, asa senimdi emespiz. Sebebi devalvatsiia men infliatsiia tutynýshylardyń demalysqa degen qarajatyn basqa jaqqa jumsaýyna yqpal etetini sózsiz. Alaida, Alakól siiaqty taǵy basqa shipajailyq kýrortty oryndarǵa, ońaltý sharalaryna suranys bolýy múmkin», - dedi R.Shaikenova.
QR Bas sanitarlyq dárigeriniń qaýlysynda týristerge arnalǵan PTR testi anyqtamasyn alý týraly tarmaq bar.
«Bul anyqtamanyń jaramdylyǵy 7 kún ǵana. Al adamdar 7 kúnnen artyq ýaqyt demalýǵa barady. Osy jerde suraq týady. Demalysqa kelgen adamdar sol jerde taǵy 7 kúnge anyqtama alýy kerek pe? Bul suraqqa jaýap joq. Salalyq ózgeshelikterge bailanysty bul qaýlyǵa ózgeris engizý týraly Bas sanitarlyq dárigerge usynyspen shyqpaqpyn», - dedi ol.
