Kollaj: Záýresh SMAǴUL, «EQ»
Astanada týristik kompaniia qyzmetkeri retinde ózin tanystyrǵan 27 jastaǵy er adamǵa qatysty alaiaqtyq faktisi boiynsha sotqa deiingi tergeý bastaldy, dep habarlaidy Ult.kz.
Kúdikti azamattarǵa Mekke qalasyna qajylyq saparyn uiymdastyramyn dep ýáde berip, aldyn ala milliondaǵan teńge qarajat jinaǵan. Alaida ýáde oryndalmaǵan, al jábirlenýshiler sany artyp keledi. Ol joldama, viza rásimdeý jáne áýe biletterin alý siiaqty qyzmetterdi syltaý etip, azamattardan aldyn ala aqsha alǵan.
Qazirgi ýaqytta 13 epizod anyqtalyp, keltirilgen jalpy materialdyq shyǵyn kólemi 2,2 mln teńgeni quraidy. Tergeý barysynda jábirlenýshiler sanynyń odan ári artýy múmkin ekeni joqqa shyǵarylmaidy. Sondai-aq, kúdiktiniń ózge uqsas qylmystarǵa qatysy bar-joǵy tekserilýde.
