«Qazaq gaz óńdeý zaýyty» JShS direktory Naqbergen Tólepov 16 shildede kásiporynda bolǵan órt boiynsha túsinik berdi, dep habarlaidy "Ult aqparat" «Qazmunaigaz» ulttyq kompaniiasynyń baspasóz qyzmetine silteme jasap.
«Keshe jergilikti ýaqyt boiynsha saǵat 22.15-te kompressorlyq tsehte aýa tońazytqyshy tutandy. Biz dereý órtti sóndirý boiynsha sharalar qabyldadyq. Zaýyt birden toqtatyldy. Órtti sóndirýge jeke órt sóndirý toptary men TJD kúshteri jumyldyryldy. Saǵat 22.52-de órt sóndirildi. Eń bastysy qaitys bolǵandar men zardap shekkender joq» – dep habarlady Tólepov.
Onyń aitýynsha, saǵat 23.30-da mamandar kásiporyndy shekteýli rejimde iske qosýǵa kiristi. Qazir zaýyttyń júktemesi shamamen 30 paiyzdy qurap otyr. Kásiporyndy tolyq qýatyna shyǵarý úshin qalpyna keltirý jumystary jalǵasyp jatyr.
Sonymen qatar, Tólepov órttiń saldarynan tek aýa tońazytqyshynyń kótergish konstrýktsiiasy ǵana búlingenin atap ótti. Negizgi jabdyqqa ziian kelgen joq.
Buǵan qosa, QazGÓZ direktory oqiǵa kezinede himiialyq zattardyń aǵyp ketýi týraly áleýmettik jelilerde tarap jatqan aqparattardy joqqa shyǵardy. Ol alańdaýǵa negiz joq ekenin basa aitty.
«Bul jabdyq shiki gazdy aýa-sý ádisi arqyly salqyndatý úshin qoldanylady. Bul jabdyqta qandai da bir himiialyq zattar paidalanylmaidy. Sondyqtan jumyskerler jáne turǵyndardyń ómiri men densaýlyǵyna qaýiptiń joq ekenin senimmen aita alamyn», – dedi Tólepov.
Onyń pikirinshe, zaýyttyń qyzmeti jaqyn arada tolyǵymen qalpyna keltiriletin bolady jáne suiytylǵan munai gazymen qamtamasyz etý boiynsha aýtqýlar bolmaidy.
Aita keteiik, osyǵan deiin Jańaózende gaz óńdeý zaýyty órtengenin habarladyq.
Sondai-aq Mańǵystaý oblysyn suiytylǵan gazben qamtamasyz etýde irkilister bolmaityny málim boldy.
