Túrkistan oblysyndaǵy ferma sharýashylyqtarynyń aýmaǵyndaǵy transheialarda jabaiy ańdardyń qyrylyp jatqany anyqtaldy. Bul týraly Qazaqstannyń bioalýandylyqty saqtaý (QBASQ) qaýymdastyǵy habarlady.
«2021 jyldyń 20 mamyrynda «SOS Djeiran» jobasy boiynsha QBASQ ekspeditsiiasyna qatysqan sarapshylar toby monitoring barysynda Saryaǵash pen Shardara aýdandarynyń aralyǵynda jańa transheialardy baiqaǵan. Transheianyń túbinde júzdegen baýyrymen jorǵalaýshyl men qosmekendi jatqan. Olardyń arasynda ásirese ortaaziialyq tasbaqalar kóp bolatyn. Tereńdigi eki metr bolatyn shuńqyrlar janýarlardyń qyrylýyna sebep bolýy múmkin.
Biz Túrkistan oblys ákiminiń orynbasary Sáken Qalqamanovpen habarlastyq, ol 21 mamyr kúni Saryaǵash aýdandyq ákimdiginiń ákimshiligin oqiǵa ornyna barýǵa yqpal etti», - dep habarlady QBASQ baspasóz qyzmeti.
Uiymnyń málimetinshe, bul másele 2019 jyly kóterilgen bolatyn. Ol kezde Zýkkov qorynyń «Ortalyq Aziia shólderi bastamasy» jobasynyń granty aiasynda uiymdastyrylǵan ekspeditsiia barysynda ǵalymdar ferma sharýashylyǵynyń mańynda jańa qazylǵan shuńqyrlardy baiqaǵan jáne onyń túbinde 365 baýyrymen jorǵalaýshy men qosmekendi bolǵan. Olardyń arasynda tabiǵatta sirek kezdesetin túrleri de bar.
Ol kezde shuńqyrdaǵy janýarlardyń barlyǵy bosatylǵan bolatyn. Alaida sol ýaqytta-aq baýyrymen jorǵalaýshylardyń 16% ystyq pen sýdyń jetispeýshiliginen ólip qalǵan. Qalǵan janýarlar da ólýge shaq qalǵan, álsiz edi.
Uzyndyǵy 1 km bolatyn osyǵan uqsas taǵy bir transheiada baýyrymen jorǵalaýshynyń birneshe túri men 2 qozy, 2 laq boldy. Olar da shuńqyrdan shyǵa almai, ózgelerdiń kómeginsiz ólip qalar edi.
Fermelerdiń aitýynsha, egis alańdaryn ajyratý tájiribesi óńirde keńinen qoldanylady.
«Alaida bul tásil kóptegen baýyrymen jorǵalaýshylar men qosmekendilerdiń qyrylýyna yqpal etedi. Bul árine, zańsyz. Óitkeni janýarlardyń arasynda erekshe qorǵaýǵa alynǵan nemese «Qyzyl kitapqa» engizilgenderi de bar.
Sol sebepti bul másele shuǵyl sharalar qabyldap, sheshýdi talap etedi.
2019-2020 jyldary QBASQ pen Bilim jáne ǵylym ministrliginiń Zoologiia insttýty oblystyq jáne respýblikalyq quzyrly organdarǵa resmi ótinish jasaǵan bolatyn», - delingen habarlamada.
