Foto: Qorǵanys ministrligi
Májilis «Qazaqstan Respýblikasynyń aýmaqtyq qorǵanysy týraly» zań jobasy men oǵan ilespe túzetýlerdi birinshi oqylymda maquldady, dep habarlaidy Ult.kz.
Negizgi zań jobasynyń maqsaty – eldiń qorǵanys qabiletin arttyrý, halyqtyń, aýmaqtyq qorǵanys obektileriniń qaýipsizdigin qamtamasyz etý jáne Qazaqstan aýmaǵyn jumyldyrý, soǵys jaǵdaiy men soǵys ýaqytynda respýblika aýmaǵyn qorǵaý.
"Zań jobasynda Qazaqstannyń qorǵanys júiesine «ózin-ózi qorǵaý quralymy» jáne «erikti adam» degen jańa uǵymdar engiziledi. Ózin-ózi qorǵaý quralymdary soǵys jaǵdaiy kezinde jáne soǵys ýaqytynda jergilikti áskeri basqarý organdaryn qurady.
Eriktiler degenimiz – ózin-ózi qorǵaý quralymdaryna erikti túrde qabyldanǵan Qazaqstan azamattary", - delingen habarlamada.
Eriktilerdiń qataryna ózin-ózi qorǵaý quralymdaryn qurý kezinde Qarýly Kúshter qataryna shaqyrylmaǵan, jumyldyrylýǵa jatatyn jáne jatpaityn adamdar kiretini aitylady. Olar eldimekenderdi, aýmaqtyq qorǵanys obektilerin kúzetý jáne qorǵaý jónindegi mindetterdi oryndaýǵa, qorǵanys qurylystaryn salýǵa, evakýatsiialaý sharalaryn júrgizýge jáne basqalarǵa tartylady. Jaýyngerlik tapsyrmalardy oryndaý úshin Qarýly Kúshterdiń quramyna eriktilerden turatyn jeke ózin-ózi qorǵaý quralymdary engizilýi múmkin.
Ilespe joba aiasynda Kásipkerlik kodekske jáne bes zańǵa túzetýler engiziledi. Olar tiisti memlekettik organdardyń (Ishki ister ministrligi, Ulttyq qaýipsizdik komiteti, Tótenshe jaǵdailar ministrligi, jergilikti atqarýshy organdar) aýmaqtyq qorǵanys salasyndaǵy quzyretterin biriktiredi.
