Parlament Májilisiniń jalpy otyrysynda «QR Úkimeti men AQSh Úkimeti arasyndaǵy Áýe qatynasy týraly kelisimdi ratifikatsiialaý týraly» zań jobasy maquldandy, dep habarlaidy QazAqparat.
Zań jobasy 2019 jylǵy 30 jeltoqsanda Nur-Sultanda jasalǵan QR Úkimeti men AQSh Úkimeti arasyndaǵy Áýe qatynasy týraly kelisimdi ratifikatsiialaýǵa baǵyttalǵan.
«Joba «Qazaqstan Respýblikasynyń halyqaralyq sharttary týraly» Qazaqstan Respýblikasy Zańynyń besinshi babynyń ekinshi tarmaǵyna sáikes ázirlendi. Kelisimniń negizgi maqsaty - Qazaqstan Respýblikasy men Amerika Qurama Shtattary arasynda tikelei áýe qatynasyn ashý úshin quqyqtyq baza qurý. Halyqaralyq azamattyq aviatsiia uiymynyń (IKAO) áýe qatynasyn yryqtandyrý jónindegi usynystaryna jáne Amerika tarapynyń usynystaryna sáikes, Kelisim aiasynda taraptar áýe kompaniialary, pýnktter men reister sany boiynsha, onyń ishinde jolaýshylar tasymaldary úshin «áýe erkindiginiń» besinshi deńgeiimen shekteýsiz usha alady», - dedi QR Indýstriia jáne infraqurylymdyq damý ministri Beibit Atamqulov.
Onyń aitýynsha, bul - el tarihyndaǵy alǵashqy «ashyq aspan» rejimindegi kelisim. Iaǵni, kez kelgen qazaqstandyq áýe kompaniia úshinshi elderge jolaýshylardy jetkizý jáne ákelý quqyǵymen Qazaqstannyń kez kelgen qalasynan Amerika Qurama Shtattarynyń kez kelgen qalasyna reister boiynsha sheksiz sanmen jolaýshylar tasymalyn, sondai-aq AQSh pýnktteri men Amerika Qurama Shtattarynan tys kez kelgen pýnktter arasynda júk tasymalyn oryndai alady.
«Kelisimdi ratifikatsiialaý týraly zańdy qabyldaý Qazaqstan Respýblikasy tarapynan qosymsha biýdjettik shyǵyndar men mindettemelerge alyp kelmeidi jáne elimizdiń kóliktik qoljetimdiligin arttyrýǵa baǵyttalǵan», - dedi ministr.
