Elimizdiń birqatar aimaǵynda biyl kúzde qabyldanǵan «Bilimdi ult» sapaly bilim berý» ulttyq jobasyn iske asyrý qolǵa alyndy. Bul týraly QR Bilim jáne ǵylym ministrliginiń baspasóz qyzmetinen málim etildi, dep habarlaidy QazAqparat.
«Qazirgi ýaqytta «Bilimdi ult» ulttyq jobasy júzege asyrylyp jatyr. Atalǵan joba aiasynda Pavlodar, Almaty, Qaraǵandy, Aqtóbe, Aqmola, Jambyl oblysy men Almaty qalasynda orta bilim berý boiynsha memlekettik tapsyrys qoldanysqa engizildi. Aldaǵy ýaqytta ulttyq jobany iske asyrý ózge óńirlerde de qolǵa alynady», - delingen habarlamada.
Memleket basshysynyń bastamasymen biyl qabyldanǵan «Bilimdi ult» ulttyq joba aiasynda 2025 jylǵa deiin orta jáne joǵary bilim berý salasynyń aldynda basty 4 mindet tur.
Odan bólek, atalǵan vedomstvo oqýshylardyń úiirmeler men sporttyq sektsiiaǵa degen qyzyǵýshylyǵyna qatysty túsinik berdi.
«Jergilikti atqarýshy organdardyń málimeti boiynsha, búginde mektep oqýshylarynyń úiirmeler men sporttyq sektsiialarǵa qatysýǵa degen belsendiligi baiqalady. Sonymen qatar, jańa oqý jylynan bastap dene tárbiesi muǵalimderine sektsiialyq jumysqa qosymsha aqy tóleýine bailanysty sporttyq sektsiia jumysy sapasynyń jaqsarǵanyn ańǵarýǵa bolady. Jalpy qosymsha bilim berýmen tek mektep qana ainalyspaidy, odan bólek arnaiy uiymdar bar. Búginde elimizde 1 272 qosymsha bilim berý uiymynda, 9 337 úiirme men sporttyq sektsiia jumys istep tur. Ministrlik bul baǵyttaǵy jumysty jalǵastyrady, osy oraida sporttyq infraqurylymdy odan ári jetildire túsý de vedomstvo nazaryndy», - deidi ministrlikten.
