"Qazaqstan halqy Assambleiasynyń qoldaýymen Táýelsizdiktiń 25 jyldyǵyna orai, 2016 jyldyń 16 shilde-12 tamyz aralyǵynda Soltústik Inelshik muzdyǵynan Qazaqstannyń eń biik núktesi - Han Táńiri shyńyna alpinister ekspeditsiiasy ótti", - dep habarlaidy Ult.kz tilshisi QazAqparat agenttigine silteme jasap.
Ekspeditsiianyń alǵashqy kezeńderinde aýa raiy buzylyp, qar jaýdy. Tek 10 tamyz kúni shyńǵa shyǵyp, Qazaqstan Respýblikasynyń Memlekettik týy kóterildi, tarihta tuńǵysh ret Memlekettik ánuran oinaldy.
Sony ideiany jáne Qazaqstannyń ulttyq simvoldaryn dáripteý úshin alpinizmde zamanaýi tehnologiialardy qoldaný bastamasyn Dicosta Technologies LTD kompaniiasynyń prezidenti, zapastaǵy ofitser, sportshy-taý shańǵyshysy, alpinist Aleksandr Serazetdinov kóterdi.
Akýstikalyq, symsyz tehnologiialardy paidalaný patriotizmdi, salaýatty ómir saltyn, urpaqtar sabaqtastyǵyn nasihattaýǵa, biik shyń basynan jurtshylyqqa úndeý tastaýǵa kómektesedi, dep habarlady kompaniianyń baspasóz qyzmeti.
Shyńǵa shyǵýǵa V. Pivtsov, A. Sofrygin, T. Áýbákirov, A. Sýbachev, K. Zenkov, M. Pavlov, A. Serazetdinov sekildi tanymal, jas qazaqstandyq alpinister atsalysty.
2014-2015 jyldary Tian-Shan, Alpi, Kavkaz jáne Pamir taýlarynda: Mánshúk Mámetova shyńy, Mármár qabyrǵa tóbesi, Monblan, Elbrýs jáne Lenin shyńynda Qazaqstan Respýblikasynyń Memlekettik ánurany oinalǵan edi.
Han Táńiri - Qazaqstan, Qyrǵyzstan jáne Qytai shekarasynda ornalasqan Tian-Shan taýynyń piramidaly shyńy, biiktigi - 7010 metr (muzdyqpen), muz qalyńdyǵyn eseptemegende - 6995 metr.
