Din isteri jáne azamattyq qoǵam ministri Nurlan Ermekbaev terroristik jáne basqa da asa aýyr qylmys úshin azamattyqtan aiyrý boiynsha zańǵa engizilgen ózgeristerge qatysty pikirin bildirdi, dep habarlaidy "Ult aqparat" vedomstvonyń baspasóz qyzmetine silteme jasap.
Ministr Elbasy N. Nazarbaev «QR keibir zańnamalyq aktilerine olardy QR Konstitýtsiiasynyń normalaryna sáikes keltirý máseleleri boiynsha ózgerister men tolyqtyrýlar engizý týraly» Zańǵa ýaqytyly qol qoiǵanyn atap ótti. Oǵan sáikes, budan-bylai terroristik jáne basqa da asa aýyr qylmys jasaǵan qazaqstandyqtar azamattyǵynan airylatyn bolady.
Búginde shetelde lańkester lagerinde Qazaqstannyń 500 azamaty bar.
N.Ermekbaevtiń atap ótýinshe, qazirgi tańda siriia-irak aimaǵynda terroristik toptar úshin jaǵdaidyń qiyndap jatqanyn bilemiz. Qylmyskerler sheginý joldaryn, sonyń ishinde ózderiniń burynǵy turǵan jerlerine qaitý múkindikterin izdestirýde. Alaida, bul olardyń qylmystyq piǵyldarynan bas tartqanyn bildirmeidi.
Sondyqtan, qazaqstandyqtardyń ishinen shyqqan osyndai adamdar qylmystyq tájiribe jinaqtap, elimizge aram niet-oimen oralýy múmkin. Osyǵan orai, jańa tolyqtyrýlarda azamattyqtan aiyrý múmkindigi qarastyrylýda».
«Másele terrorizm aktilerin, terroristik toptardy qurý jáne basqarý, onyń qyzmetine qatysý, sondai-aq respýblikamyzdyń ulttyq jáne ómirlik mańyzy bar múddelerine asa aýyr ziian keltirý týraly bolyp otyr. Sot istiń mán-jaiyn, jasaǵan áreketiniń aýyrlyǵyn, keltirgen zardaptaryn tolyq zerdeleý negizinde erekshe jaǵdailarda ǵana azamattyǵynan aiyrady» - dep naqtylady ol.
Ministr týǵan jerin tastap, shetelge terroristik qurylymdarǵa qatysýǵa ketken adamdar Otanyna opasyzdyq jasaǵandarǵa teńeletinin qadap aitty.
