Qytailyq «CoronaVac» vaktsinasynyń 500 myń dozalyq alǵashqy partiiasy Beijińnen Almatyǵa ákelindi, dep habarlaidy QazAqparat.
Preperatty qytailyq Sinovac Biotech Ltd biofarmatsevtika kompaniiasy óndirgen. Ol arnaiy bortpen jetkizildi.
Bul - aldaǵy kúnderi QR azamattaryna koronavirýs infektsiiasyna qarsy vaktsinatsiia úshin qoldanylatyn tórtinshi preparat bolmaq.
«Biz eki eldiń ýaǵdalastyǵy arqasynda baǵa jetpes júk aldyq. Bul vaktsina Qazaqstandaǵy jaǵdaidy turaqtandyrýǵa jáne odan ári jaqsartýǵa qyzmet etedi. Preparat erteń Almatynyń egý pýnktilerinde qoljetimdi bolady jáne ujymdyq immýnitetti qalyptastyrýǵa kómektesedi. Búginde Almatyda 300 myńnan astam adamǵa ekpe salyndy. Biz qala turǵyndaryn óziniń jáne jaqyndarynyń densaýlyǵyna baiypty qaraýǵa shaqyramyz, vaktsina - búginde koronavirýs infektsiiasynyń aldyn alýdyń eń tiimdi quraly», - dedi qalanyń bas sanitar dárigeri Jandarbek Bekshin.
CoronaVac vaktsinasyn Qazaqstan aýmaǵynda qoldanýǵa QR Densaýlyq saqtaý ministrligi maquldady jáne elde qoldanylyp júrgen QazVac, «Spýtnik V» jáne Hayat Vax vaktsinalarynyń tizbesin tolyqtyrady.
Sonymen qatar QR SIM Almaty qalasyndaǵy ókildiginiń basshysy Asqar Shoqybaev QHR-dan CoronaVac vaktsinasyn jetkizý týraly ýaǵdalastyqty iske asyrý COVID-19 pandemiiasyna birlesip qarsy turýda qytailyq áriptestermen bastalǵan yntymaqtastyqty tabysty jalǵastyrýdyń mysaly retinde qarastyrylatynyn aitty.
Habarlanǵandai, kelip túsken vaktsina partiiasy qoldanystaǵy qazaqstandyq jáne reseilik vaktsinalarmen qatar elimizdiń barlyq egý pýnktilerinde qoljetimdi bolady.
