Qazaqstandyqtar uialy qosymsha arqyly dári-dármektiń baǵasyna shaǵymdana alady, dep habarlaidy "Ult aqparat" QR DSM baspasóz qyzmetine silteme jasap.
QR Densaýlyq saqtaý ministrligi jarty jylda bir ret bólshek jáne kóterme saýda úshin dári-dármektiń shekti baǵasyn bekitedi. Bul dárilik zattar naryǵyndaǵy alypsatarlyqtyń aldyn alady jáne baǵanyń negizsiz ósýine jol bermeidi. Ministrliktiń buiryǵyna sáikes elimizde dárihanalardaǵy dári-dármektiń quny belgilengen shekti baǵadan aspaýy tiis. Árbir preparattyń baǵasy bólek jazylǵan.
«Qoǵamdyq monitoring jáne baǵany baqylaý úshin DARI.KZ mobildik qosymshasy ázirlendi, ol arqyly ár adam dárihanadaǵy dári-dármektiń baǵasyn baqylai alady. Baǵa negizsiz qymbattasa, qosymshaǵa shaǵym jazýǵa bolady. Shaǵymdy QR DSM Taýarlar men qyzmetterdiń sapasy men qaýipsizdigin baqylaý komitetiniń aýmaqtyq bólimsheleri tekseredi.
Jyl basynan bastap DARI.KZ mobildi qosymshasyna dárilik zattardyń bekitilgen shekti baǵasyna qatysty jeke tulǵalardan 191 ótinish tústi», delingen habarlamada.
Dárihanalarda dári-dármekke qatysty daýly jaǵdailardy eskere otyryp, ákimdikterdiń janynan dári-dármektiń shekti bólshek jáne kóterme baǵalarynyń saqtalýyn tekseretin monitoring toptary quryldy. Sondai-aq óńirler boiynsha dárilik zattardyń bar-joǵy jáne baǵasy týraly málimet usynatyn anyqtamalyq qyzmetterdiń (I-Teka, MPI, Farmgorodok, Gippokrat, 103.kz, Biosfera) aqparaty taldanady.
Taýarlar men qyzmetterdiń sapasy men qaýipsizdigin baqylaý komitetiniń aýmaqtyq bólimsheleri QR QM Ekonomikalyq tergeý departamentiniń qyzmetkerlerimen, sondai-aq basqa da memlekettik organdarmen birlesip dárihana uiymdaryna dárilik zattar men jeke qorǵaný quraldarynyń, onyń ishinde maskalardyń baǵasyna tekserý júrgizedi.
«QR «Ákimshilik quqyq buzýshylyq týraly« kodeksine sáikes, dárilik zattardy, meditsinalyq maqsattaǵy buiymdar men meditsinalyq tehnikany kóterme jáne bólshek saýdada satý erejelerin buzǵany úshin aiyppul salynady. Jeke tulǵalarǵa – 70, laýazymdy adamdarǵa – 100, shaǵyn kásipkerlik sýbektilerine – 130, orta kásipkerlik sýbektilerine – 200, iri kásipkerlik sýbektilerine 1000 ailyq eseptik kórsetkish mólsherinde aiyppul tóleidi.
Dárilik zattarǵa shekti baǵany kótergen barlyq fakti boiynsha qoldanystaǵy zańnamaǵa sáikes jaýapkershilikke tartylady», delingen habarlamada.
Densaýlyq saqtaý ministriniń 2019 jylǵy 15 shildedegi № QR DSM-104 «Bólshek jáne kóterme saýdada ótkizýge arnalǵan dárilik zattardyń saýda ataýyna shekti baǵalardy bekitý týraly» buiryǵynda dárilik zattardyń shekti baǵalary kórsetilgen, ony QR DSM QKKB, «Dárilik zattar men meditsinalyq buiymdardy saraptaý ulttyq ortalyǵy» saittarynan, sondai-aq QR Ádilet ministrliginiń Normativtik bazasynan tabýǵa bolady.
