Foto: primeminister.kz
Úkimet otyrysynda Premer-ministr Oljas Bektenov jańa Konstitýtsiianyń qabyldanýy quqyqtyq memleket qaǵidattaryn nyǵaityp, eldigimizdiń tiregi bolatynyn atap ótti. Bul týraly Ult.kz Úkimettiń Telegram arnasyna silteme jasap habarlaidy.
«Quqyqtyq memleket qaǵidattaryn nyǵaitý, zań kómegin alý quqyǵyna jáne derbes derekterdiń qorǵalýyna kepildik berý negizgi zań deńgeiinde bekitilip otyr. Prezident atap ótkendei, jańa Konstitýtsiia eldigimizdiń tiregi, Egemendigimiz ben Táýelsizdigimizdiń tuǵyry bolady. Qazaqstandyqtar Memleket basshysynyń barlyq bastamalaryn qoldap, óz daýystarymen naǵyz otanshyldyqtyń úlgisin pash etti. Búginde jahan jurtynyń Qasym-Jomart Kemeluly Toqaevtyń kóshbasshylyǵyna jáne qabyldanǵan Konstitýtsiiamyzdyń progressivti sipatyna kýá bolǵanyn kórip otyrmyz. Bul Qazaqstannyń joǵary bedeli men júrgizilip jatqan reformalardyń tiimdiligin aiqyn bildiredi», – dep atap ótti Premer-ministr.
Sonymen qatar Úkimet Parlamentpen birlesip, tez arada birqatar zańdar men zańǵa táýeldi aktilerdi jańa Konstitýtsiiaǵa sáikes keltirýge tiis.
«Óz kezeginde, biz Prezidenttiń komandasy retinde, aldymyzda turǵan maqsat-mindetterge qol jetkizip, reformalardyń sapasy men ozyq qarqynyn qamtamasyz etýimiz kerek. Memleket basshysynyń tapsyrmasyn oryndaý aiasynda Úkimet Parlamentpen birlesip, tez arada birqatar zańdar men zańǵa táýeldi aktilerdi jańa Konstitýtsiiaǵa sáikes keltirýge tiis. Atap aitqanda, 5 jańa jáne qoldanystaǵy 8 konstitýtsiialyq zańǵa, sondai-aq 60-tan astam zańǵa, onyń ishinde negizgi kodeksterge túzetýler engizý kerek», – dep atap ótti Oljas Bektenov.
Sonymen qatar Premer-ministr Ata zańdy jappai basyp shyǵarýdy, ony qoljetimdi elektrondyq platformalarda ornalastyrýdy, bilim berý salasy úshin ádistemelik nusqaýlar men oqý-ádistemelik quraldardy ázirleýdi talap etetin Konstitýtsiiany ilgeriletý boiynsha is-sharalar josparyn ázirlep, bekitý qajettigine nazar aýdardy. Sondai-aq elimizdiń jańa Konstitýtsiiasy týraly aqparattyq-túsindirý jumystaryn kúsheitý qajet.
