Foto: videodan skrinshot
Qazaqstan álemdik kreativ indýstriiasynda taǵy bir jetistikke qol jetkizdi. Álemniń ár túkpirinen eń úzdik 50 avtordy biriktiretin TikTok-tyń The Discover List 2026 halyqaralyq tizimine almatylyq sýretshi Assel Sabyjanqyzy endi. Osylaisha Qazaqstan bul jobada ekinshi jyl qatarynan usynylyp otyr.
The Discover List – tsifrlyq keńistikte aýditoriiany shabyttandyryp, jańa trendter qalyptastyryp júrgen avtorlardy aiqyndaityn jyl saiynǵy halyqaralyq joba. Kreatorlar bes baǵyt boiynsha irikteledi: oqytýshylar, gýrmandar, ikonalar, innovatorlar jáne kásipkerler. Baǵalaý barysynda aýditoriia belsendiligi, jazylýshylar sanynyń ósý dinamikasy, qaralymdar men laiktar kólemi, sondai-aq avtordyń platforma ishindegi jáne odan tys tanymaldyǵy eskeriledi. Sonymen qatar trendterge yqpal etýi, kontent sapasy men aýditoriiamen bailanys deńgeii saralanady.
2026 jylǵy tizimge Qazaqstanmen qatar AQSh, Italiia, Japoniia, Braziliia, Keniia, Ulybritaniia, Indoneziia, Aýstraliia jáne Ońtústik Afrika ókilderi engen.
Biyl qazaqstandyq sýretshi Assel Sabyjanqyzy (@assolyaa) «Innovatorlar» sanaty boiynsha tańdaldy. Ol dástúrli sándik-qoldanbaly ónerdi zamanaýi formatta jańǵyrtyp júrgen shyǵarmashylyq iesi retinde tanyldy. Sýretshi «Carpet Art» dep atalatyn avtorlyq tehnikada jumys isteidi: kilem betine aýqymdy kórkem týyndylar túsirip, ulttyq oiý-órnekter men zamanaýi vizýaldy sheshimderdi úilestiredi.
Asseldiń shyǵarmashylyǵynda qazaq dástúrleri, túrki tarihy jáne tarihi tulǵalardyń beineleri airyqsha oryn alady. Onyń «Uly dala patshaiymdary» seriiasy joǵary detalizatsiiasymen, kúrdeli kompozitsiialyq qurylymymen jáne ulttyq naqyshtyń moldyǵymen erekshelenedi.
Sonymen qatar sýretshi álemdik juldyzdardyń portretterin de óz tehnikasynda oryndaǵan. Atap aitqanda, týyndylar qatarynda Djennifer Lopes, Kilian Mbappe, Djeki Chan jáne Dimash Qudaibergen bar. Keibir jumystaryn avtor keiipkerlerdiń ózine tabystaǵan. Bul oqiǵalar halyqaralyq buqaralyq aqparat quraldarynyń nazaryn aýdaryp, qazaqstandyq ónerge degen qyzyǵýshylyqty arttyrdy.
«The Discover List tiziminde Qazaqstan atynan shyǵý – men úshin úlken mártebe. Ulttyq ónerdiń zamanaýi formatta álemge túsinikti bola alatynyn kórsetýge tyrysamyn. Shyǵarmashylyǵym arqyly qazaq mádenietine jańasha kózqaras qalyptastyrýǵa úles qosyp jatqanyma qýanyshtymyn», – dedi sýretshi.
Aita keteiik, ótken jyly bul tizimde «Oqytýshylar» sanatynda Jetisý oblysy Alakól aýdanynyń muǵalimi Botagóz Omarova da tanylǵan bolatyn. Osylaisha qazaqstandyq avtorlar halyqaralyq kreativ keńistikte óz ornyn nyǵaityp keledi.
