Foto: Videodan skrinshot
AQSh-tyń Los-Andjeles qalasynda turyp jatqan qazaqstandyq kásipqoi boksshy Madiiar Ashkeevtiń úiinde órt boldy. Bolǵan jaǵdaidy sportshy videoǵa túsirip, áleýmettik jelidegi paraqshasynda jariialady, dep habarlaidy Ult.kz.
Boksshynyń sózinshe, ol otbasymen birge dostaryna qonaqqa shyǵaiyn dep jatqan kezde úiden kúigen iis shyqqanyn baiqaǵan. Garajdyń esigin ashqanda úidiń bir bóligine ot tiip úlgergenin kórip, birden jaqyndaryn syrtqa alyp shyqqan. Oqiǵa ornyna kelgen órt sóndirýshiler tilsiz jaýdy jedel túrde baqylaýǵa alyp, tolyq sóndirgen.
«Ár qiyndyqtyń artynda bir jeńildik bar. Allaǵa shúkir, bárimiz amanbyz», – dep jazdy sportshy.
Qazir Ashkeevtiń otbasy ýaqytsha dostarynyń úiinde turyp jatyr. Biraz ýaqyttan keiin boksshy oqyrmandaryna qaita bailanysqa shyǵyp, órtten keiingi jaǵdaidy kórsetip, eshkimniń zardap shekpegenin jetkizdi. Áleýmettik jeli qoldanýshylary oǵan qoldaý bildirip, qajet bolsa qarjylai kómek kórsetýge daiyn ekenin aitqan.
Aita keteiik, Madiiar Ashkeev – Qazaqstan chempionatynyń júldegeri jáne 2014 jylǵy Búkilálemdik boks seriiasynyń qola medal iegeri. Ol sondai-aq Soltústik Amerika boks federatsiiasy men Ulttyq boks qaýymdastyǵynyń chempiondyq titýldaryn ielengen. Kásipqoi ringte 15 jekpe-jek ótkizip, onyń 14-inde jeńiske jetken. Sońǵy ret 2020 jyldyń jeltoqsanynda amerikalyq boksshy Charlz Konýellmen kezdesip, jeńilip qalǵan edi. Sol jekpe-jekten keiin ol USNBC belbeýinen aiyryldy.
