Foto: ashyq derekkóz
Astana Hub qatysýshysy – Cyber Temple ázirlegen DarkSwitch oiyny jaryqqa shyqpai turyp-aq halyqaralyq aýditoriianyń qyzyǵýshylyǵyn týdyrdy, dep habarlaidy Ult.kz.
Jobanyń mýzykalyq súiemeldeýin japon kompozitory Akira Iamaoka jazǵan. Ol álemge tanymal Silent Hill seriiasynyń saýndtrekterimen belgili. Bul áriptestik qazaqstandyq oiyn indýstriiasynyń jahandyq deńgeidegi mamandarmen jumys isteýge qabiletti ekenin kórsetedi.
Oiynnyń ańdatpasy jariialanǵan sátten bastap-aq qoldanýshylar nazaryn aýdarǵan. Qazirgi tańda 230 myńnan astam adam ony kútý tizimine qosqan. Joba óz janrynda aptanyń eń kóp kútiletin oiyndarynyń top-5 qataryna enip, city-builder sanatynda 8-orynǵa deiin kóterildi.
DarkSwitch – dark-fentezi stilindegi qala qurylysy simýliatory men ekonomikalyq strategiia. Oiynshylar jumbaq tumannan qorǵaný úshin alyp aǵashtardyń ainalasynda qala salyp, onyń turaqty damýyn qamtamasyz etedi. Joba tereń siýjetimen, aiqyn keiipkerlerimen jáne árbir sheshimniń oiyn álemine áser etetin mehanikasymen erekshelenedi.
Kompaniianyń negizin qalaýshy ári bas direktory Aleksei Nazarov jobany 50-den astam mamannan quralǵan halyqaralyq komanda ázirlegenin aitty. Onyń jartysynan kóbi – qazaqstandyqtar. Sonymen qatar, jobaǵa TMD elderimen qatar Ispaniia, Polsha, Serbiia, AQSh, Ulybritaniia, Qytai jáne Japoniia mamandary qatysqan.
Onyń sózinshe, oiyn tórt jyldan astam ýaqyt boiy jasalyp, qomaqty eńbek jumsalǵan. Relizge sanaýly kún qalǵanda joba SteamDB platformasynyń Upcoming Releases tiziminde 5-orynǵa shyqqan. Bul kórsetkish DarkSwitch-tiń álemdegi eń kóp kútiletin oiyndardyń biri ekenin dáleldeidi.
Jobanyń basty erekshelikteriniń biri – tik arhitektýraǵa negizdelgen qala qurylysy. Shekteýli keńistikte kópdeńgeili infraqurylym jasaý qajettiligi oiynǵa erekshe dinamika beredi. Onda 80-nen astam ǵimarat túri men birneshe tehnologiialyq deńgei qarastyrylǵan. Barlyq grafika qolmen jasalyp, oiynnyń biregei stilin aiqyndai túsedi.
DarkSwitch básekeli halyqaralyq naryqtarǵa baǵyttalǵan. Qazirgi tańda oiyn alty tilde qoljetimdi: aǵylshyn, frantsýz, nemis, qytai, orys jáne poliak tilderi. Dybystaý aǵylshyn jáne orys tilderinde usynylǵan. Sonymen qatar, stýdiia qazaq tilindegi nusqasyn da ázirleýde.
Joba avtorlarynyń aitýynsha, álemniń túkpir-túkpirindegi qoldanýshylar oiyndy júktegen saiyn Qazaqstannyń týyn kórýi – komanda úshin erekshe mańyzdy.
Sarapshylardyń pikirinshe, DarkSwitch relizi otandyq geimdev indýstriiasynyń jańa kezeńge ótkenin kórsetedi. Qazaqstanda jahandyq naryqqa baǵyttalǵan, halyqaralyq aýditoriiany qyzyqtyra alatyn ónimder jasaityn ázirleýshilerdiń qatary artyp keledi.
