Foto: kpl.kz
Memlekettik "Atyraý" fýtbol klýby satylymǵa shyǵaryldy. Klýbtaǵy 100% úles úshin keminde 175,6 million teńge suralady. Bul týraly Memlekettik satyp alý portalynda jariialandy, dep habarlaidy Ult.kz.
Aqparatqa sáikes, investorǵa 27 mindetti oryndaý kerek. Onyń ishinde óz qarajatyn keminde 1 milliard teńgeni fýtbol akademiiasyn salý mindettelgen. Saýda 2026 jylǵy 10 naýryzǵa belgilengen. Ótinimder qazir qabyldanýda. Klýb tek bir qatysýshyǵa satylýy da múmkin.
Bastapqy baǵa – 175,6 million teńge. Sarapshylar baǵasy boiynsha klýbtyń naryqtyq quny – 250,8 million teńge. Al aktivterdiń balanstyq quny – 153,6 million teńge. Baǵalaý 2025 jylǵy jeltoqsanda jasalǵan.
Akademiia úsh jyldyń ishinde salynýy tiis. Ol úshin jobalyq qujattar men oń qorytyndy bir jyl ishinde alynýy kerek. Akademiiada ashyq jáne jabyq alańdar, dýsh jáne sanitarlyq bólmeler, jattyqtyrýshylar men meditsinalyq bólmeler, qalpyna keltirý aimaqtary, keminde 50 sportshyǵa arnalǵan jataqhana bolýy kerek.
Sonymen qatar, investor "Mýnaishy" stadiony men jattyǵý bazasyn jaqsy jaǵdaida ustaýǵa mindetti. Stadion 1950 jyly salynǵan jáne 8,7 myń adamǵa eseptelgen.
Úsh jyldan keiin akademiiada keminde 1 myń adam oqýy tiis. Sondai-aq, negizgi quramǵa jergilikti jáne qazaqstandyq fýtbolshylardy tartý júieli júrgizilýi kerek. Klýbtyń tarihi ataýy, túsi jáne emblemasyn ýákiletti organnyń kelisiminsiz ózgertýge bolmaidy.
"Atyraý" fýtbol klýby 1980 jyly qurylǵan. Bastapqyda "Prikaspiets" dep atalǵan, 2000 jyly – "Aq Jaiyq", al 2001 jyldan beri qazirgi ataýyn alyp júr. 2001 jáne 2002 jyldary Qazaqstan chempionatynda kúmis medalǵa ie bolǵan. 2009 jyly Qazaqstan Kýbogyn jeńgen. Qazir komanda Qazaqstan Premer-ligasynda 13-orynda tur.
