2021 jyldyń 11 aiynda elde 108 azamat poiyz astyna túsken, olardyń jartysynan kóbi mert bolǵan, dep habarlaidy QazAqparat Kóliktegi politsiia departamentiniń baspasóz qyzmetine silteme jasap.
Jyl basynan beri kóliktegi politseiler poiyzdy shuǵyl toqtatýǵa qatysty 2 482 fakti tirkedi. Onyń ishinde temirjolda adamdardyń bolýyna bailanysty – 504, maldyń júrýine bailanysty – 1 884 jaǵdai anyqtalǵan.
«Qostanai oblysy «Qoibaǵar-Qusmuryn» ótkeliginde «Almaty-Qostanai» baǵytyndaǵy jolaýshylar poiyzy 2 jylqyny basyp ketti. Osyǵan bailanysty maldyń iesine QR Ákimshilik quqyq buzýshylyq kodeksiniń 559-baby 1-bóligi (Temirjol arqyly minis maldy jáne tabyndy aidap ótý, temirjoldardyń bólingen jolaǵynda mal jaiý qaǵidalaryn buzý) boiynsha ákimshilik hattama toltyrylyp, 5 AEK (14 585 teńge) kóleminde aiyppul salyndy. Poiyz 45 minýt boiy turyp qaldy», - dedi Kóliktegi PD bastyǵy Ońal Bekiev.
Onyń aitýynsha, eseptik kezeńde belgilengen jerlerde temirjoldy kesip ótkeni úshin 25 112 adam jaýapqa tartylǵan.
«Osy jyldyń 11 aiynda elde 108 azamat poiyz astyna túsken, olardyń jartysynan kóbi mert boldy», - dep atap ótti.
«Temirjol eń qaýipti aimaq bolyp sanalady. Ár azamat temirjol aimaǵynda júrý erejesin bilýi tiis. Bizdiń, sondai-aq jaqyndarymyz ben týystarymyzdyń ómiri men densaýlyǵy osyǵan bailanysty. Adam ómirinen mańyzdy eshteńe joq», - dep túiindedi politsiia general-maiory.
