Tótenshe jaǵdai rejimi kezinde Qazaqstan 5 memleketpen 117 turaqty avtobýs baǵytyn toqtatyp, 4 eldiń shekarasyndaǵy jeke avtomobil ótkizetin 20 pýnkt ýaqytsha jabyldy. Bul týraly QR Indýstriia jáne infraqurylymdyq damý ministrligi habarlady.
Biylǵy jyl basynan avtomobil kóligi salasynda respýblika ishinde 5,3 mln jolaýshy, 675,3 mln tonna júk tasymaldanǵan. Al halyqaralyq qatynasta 2,3 mln tonna júk tasymaldansa, onyń ishinde: eksport – 640 myń tonna, import - 1,7 mln tonna boldy. Sonymen qatar, 380 myń tonna tranzittik júk tasymaldandy.
«2020 jyldan bastap áleýmettik mańyzdy baǵyttarda qyzmet etetin tasymaldaýshylar qosymsha qun salyǵyn tóleýden 3 jylǵa bosatylady. Osyny kózdeitin zań jobasy qazirgi kezde Májilistiń qaraýynda.
Búginde avtomobil tasymaldary salasynda 3,5 myńǵa jýyq kásiporyn júk tasymaldaýmen ainalysady. 1 myńǵa tarta kásiporyn turaqty avtobýs tasymaldaryn júzege asyrady. Olardyń 17,5 myńnan astam avtokóligi bar», - delingen aqparatta.
QR Indýstriia jáne infraqurylymdyq damý ministrliginiń álemde COVID-2019 infektsiiasynyń taralýyna jáne elimizde tótenshe jaǵdaidyń engizilýine bailanysty jyl basynan qabyldaǵan sharalary:
- Qytai, Resei, Qyrǵyzstan, Ózbekstan jáne Mońǵoliiamen 117 turaqty avtobýs baǵyty toqtatyldy;
- halyqaralyq turaqty emes jáne tranzittik jolaýshylar tasymalyna tyiym salynady;
- karantin engizilgen óńirlerge/óńirlerden jolaýshylardy oblysaralyq jáne qalaaralyq tasymaldaý toqtatyldy;
- karantin engizilgen aimaqtarda avtovokzaldar men avtostantsiialardyń jumysy toqtatyldy;
- oblystardyń, Nur-Sultan, Almaty jáne Shymkent qalalary ákimdikterine tótenshe jaǵdai rejimi kezeńinde óńirlerde avtokólikpen jolaýshylar tasymaldaýdy shekteý boiynsha usynymdar joldandy;
- shet memleketterdiń quzyretti kólik organdaryna halyqaralyq qatynasta júkterdi tasymaldaý kezinde sanitarlyq is-sharalardy saqtaý qajettigi týraly usynymdar jiberildi;
- Qytaimen, Reseimen, Qyrǵyzstanmen jáne Ózbekstanmen memlekettik shekara arqyly 20 jeke avtomobil ótkizý pýnkti ýaqytsha jabyldy.
Al halyqaralyq jáne respýblikaishilik qatynasta júk avtokólik quraldarymen júk tasymaldaýǵa shekteýler engizilmegenin aita ketý kerek. Qazirgi ýaqytta baǵdarlardyń qysqarýyna nemese toqtatylýyna bailanysty qazaqstandyq avtobýs tasymaldaýshylarynyń ahýalyna saraptamalyq baǵalaý júrgizilip, salany qoldaýǵa qatysty usynylatyn sharalar qarastyrylyp jatyr.
