Qazaqstanda jas pedagogtardy Ulttyq biliktilik testileýin tapsyrǵannan keiin jumysqa qabyldaý josparlanyp otyr. Bul týraly bilim jáne ǵylym ministriliginiń baspasóz qyzmeti habarlady. Ministrliktiń aqparatyna sáikes, joǵary oqý oryndarynyń jas pedagog-túlekterin ulttyq biliktilik testileýin tapsyrǵannan keiin jumysqa qabyldaý boiynsha jańashyldyq pedagogikalyq kadrlardy daiarlaý sapasyn kúsheitýge baǵyttalǵan. Biliktilik testileýi pándik bilim deńgeiin jáne oqý pánin oqytý ádistemesin meńgerýin anyqtaýǵa múmkindik beredi.
Sonymen qatar QR bilim jáne ǵylym ministriligi mektepke deiingi jáne orta bilim komitetiniń tóraiymy Maira Meldebekova munyń balalarǵa beriletin bilim sapasyn qamtamasyz etetin pedagog mamandar daiarlanýy úshin engizilip otyrǵanyn jetkizdi.
"Biylǵy oqý jylynyń joǵary oqý oryndarynyń túlekteri men osy ýaqytqa deiin mektepte jumys istemegen pedagogtar ulttyq biliktilik testileýin tapsyrýǵa tiis. Ulttyq biliktilik testileý tapsyrý qorytyndysy boiynsha qajetti ball jinaǵan adamdardy jumysqa qabyldaý josparlanýda", - dedi Maira Meldebekova.
Onyń sózinshe, testileýden ótý kezinde qajetti bilimdi kórsetkennen keiin túlekter mektep qabyrǵasynda kásibi daǵdylaryn kórsete alady. Áńgime tek jańadan bastaǵan pedagogter týraly bolyp otyr, talap qazirdiń ózinde jumys isteitinderge qoldanylmaidy.
Sondai-aq ministrlik qazaqstandyq joǵary oqý oryndaryna bitirýshi kýrs stýdentteri arasynda jańashyldyqtyń oryndylyǵy men qajettiligi týraly aqparattyq-túsindirý jumystaryn júrgizý tapsyryldy.
Qazirdiń ózinde Ulttyq biliktilik testileý tapsyrý bastaldy. Tapsyrý úshin Ulttyq testileý ortalyǵynyń saitynda aldyn ala tirkelý qajet.
Aita keteiik, 2020 jyldan bastap pedagogikalyq mamandyqtarǵa joǵary oqý oryndaryna túsýge niet bildirýshilerge qoiylatyn talaptar kúsheitildi. Eger buryn bolashaq pedagogtar úshin UBT-nyń shekti baly 50 bolsa, endi ol 75 ballǵa deiin kóterildi. Shákirtaqy kólemi de 26 myńnan 42 myń teńgege deiin ulǵaityldy.
Sonymen qatar biylǵy jańashyldyqtyń biri – respýblikadaǵy mektep direktorlarynyń rotatsiiasy. Qazaqstannyń Bilim jáne ǵylym ministri Ashat Aimaǵambetov aityp berdi.
"Men qazir pikirtalasty kórip otyrmyn, erteń búkil el boiynsha 7 500 direktor bir kúnde kenetten ózgeredi dep aita bastady. Birinshiden, bul olai emes. Ekinshiden, Pavlodar oblysynan Qaraǵandy oblysyna nemese Qaraǵandy oblysynan Túrkistan oblysyna eshkim jibermeitini túsinikti, óitkeni bul áleýmettik paket máselesi, bul otbasy, bul sol jerde turý máselesi jáne taǵy basqalar", - dedi Aimaǵambetov.
Ministrdiń sózinshe, halyqaralyq tájiribe zerdelendi, sheshim barlyq qoldaýlar men qarsylyqtardy eskere otyryp qabyldanady.
"Biz áriptesterimizben direktorlardy aýystyrý erejelerin talqylaimyz. Úsh jyl ne bes jyldan keiin bolýy kerek pe, talqylanady. (...) Jaǵdailar ártúrli bolýy múmkin. 60 jastaǵy mektep direktory 30 jyl jumys istep, tiimdi eńbek ete alady. Biraq bul sirek kezdesetin erekshelik. Negizinen tájiribe kadrlardy jańartý, rotatsiia óte mańyzdy ekenin kórsetedi", - dep tolyqtyrdy ministr.
Aita keteiik, buǵan deiin ministr áleýmettik jelidegi paraqshasynda rotatsiia institýty memlekettik qyzmette, biznes-qurylymdarda jáne basqa da kóptegen salalarda bar ekenin aitty. Alaida buǵan deiin bilim berý júiesinde rotatsiiany qoldaný múmkin bolmady.
"Bizde memlekettik bilim berý uiymdary basshylarynyń kóbinde merzimsiz eńbek sharttary bar. Árine, óz isine berilgen kóp myqty basshy bar, sonymen qatar olar óz uiymyn jetildirý úshin qoldan kelgenniń bárin jasaidy. Alaida, eshkim kásibi kúizelisti, motivatsiianyń joqtyǵyn jáne basqa qyzmetkerlerdiń mansaptyq satysyna kóterilýge degen umtylysty joqqa shyǵarmaidy", - degen bolatyn bilim jáne ǵylym ministri.
Sondyqtan menedjerler kóptegen jyl boiy óz oryndarynda qaldy. Munyń artyqshylyǵymen qatar kemshilikteri de bar.
"Ashyq NQA" portalynda memlekettik bilim berý uiymdarynyń birinshi basshylaryn rotatsiialaýdy júrgizý qaǵidalarynyń jobasy paida boldy. Attestattaý jáne olardyń qyzmetiniń tiimdiligin jyl saiynǵy baǵalaý nátijeleri boiynsha mektep direktorlaryn úsh jylda bir ret aýystyrý usynylady. Ereje jobasynda zeinetke shyqqanǵa deiin úsh jyl nemese odan az qalǵan adamdar rotatsiiadan bosatylýy múmkin ekendigi kórsetilgen.
