RIA Novosti
Birinshi jartyjyldyqta 1 300-ge jýyq esirtki qylmysy tirkeldi. Onyń 800-i esirtki ótkizýge, 227-i esirtkini asa iri mólsherde saqtaýǵa qatysty. Bul týraly IIM esirtkige qarsy is-qimyl departamentiniń basqarma bastyǵy Baqytjan Ámirhanov baiandady, dep jazdy Sputnik Qazaqstan.
Spikerdiń málimetinshe, Nur-Sultan qalasy, Atyraý jáne Pavlodar oblystarynda esirtki satýmen, jetkizýmen, sondai-aq sintetikalyq esirtkini ótkizýmen ainalysqan úsh uiymdasqan qylmystyq toptyń joly kesildi.
"3,3 tonnadan astam túrli esirtki tárkilep alyndy. Onyń ishinde 2 tonnaǵa jýyq marihýana, 366 kg gashish jáne 84 kg sintetikalyq esirtki bar. Nur-Sultan, Almaty qalalarynda, Aqtóbe, Almaty, Shyǵys Qazaqstan, Jambyl jáne Qaraǵandy oblystarynda 21 esirtki zerthanasy joiyldy. Internet resýrstary arqyly esirtki ótkizý faktileri boiynsha 103 qylmystyq is tirkeldi. Esirtki jarnamasy men nasihattaý boiynsha 57 qylmystyq is tergelýde. Esirtkige qatysty aqparat jariialanǵan 1400-ge jýyq internet resýrs anyqtalyp, buǵattaýǵa joldandy", – dep atap ótti Baqytjan Ámirhanov.
Sondai-aq brifing barysynda esirtkige qarsy profilaktikalyq ailyqtyń qorytyndysy jariialandy. 27 mamyrda bastalǵan shara aiasynda jastar arasynda onlain seminar trening uiymdastyrylyp, 150 qatysýshyǵa sertifikat tabystaldy.
"Ailyq sheńberinde meditsinalyq joǵary oqý oryndary men kolledj stýdentteri, sondai-aq meditsina qyzmetkerleri úshin oqytý seminarlary uiymdastyryldy. Respýblika boiynsha barlyǵy 29 seminar ótkizilip, oǵan 1133 maman qatysty. Qostanai oblysynyń politsiia jáne qylmystyq atqarý júiesi departamentteri túsirgen "Bizdiń zamannyń zulymdyǵy" derekti filminiń tusaýkeseri ótti", – dep túiindedi spiker.
