Veterinariia júiesindegi barlyq baqylaý-qadaǵalaý fýnktsiialary bir vedomstvoda shoǵyrlanady. Bul týraly Aýyl sharýashylyǵy ministri Erbol Qarashókeev málim etti, dep habarlaidy QazAqparat agenttigi.
«Birinshi másele – ol veterinariia júiesin reformalaý. Búgingi tańda biz osy júieniń qazirgi ahýalyn muqiiat taldadyq, problemalyq máseleler men olardyń paida bolý sebepterin anyqtadyq. Osynyń negizinde olardy sheshý tásildemeleri ázirlendi. Atap aitqanda, endi veterinariia júiesindegi barlyq baqylaý-qadaǵalaý fýnktsiialary bir vedomstvoda, atap aitqanda, Aýyl sharýashylyǵy ministrliginiń Veterinariialyq qadaǵalaý jáne baqylaý komitetinde shoǵyrlandyrylatyn bolady. Jergilikti atqarýshy organdardyń veterinariialyq qyzmetteri tek atqarýshylyq fýnktsiialardy oryndaidy. Osyndai usynysty tiisti reforma jobasynda engizip otyrmyz. Ekinshiden, kelesi jyldan bastap praktikalyq veterinariialyq dárigerlerdiń jalaqysy orta eseppen 68%-ǵa ósedi», - dedi E. Qarashókeev Ortalyq kommýnikatsiialar qyzmetinde.
Onyń aitýynsha, veterinariialyq dárigerler ózine tán emes fýnktsiialardan (qańǵybas itter men mysyqtardy aýlaý) bosatylyp, ózderiniń fýnktsionaldyq mindetterin oryndaý úshin veterinariialyq zańnamany buzýshylardy jaýapkershilikke tartý sekildi qosymsha ókilettikter alady.
