Elordadaǵy Gorkii atyndaǵy teatrdyń aktrisasy Svetlana Fortýna vaktsinalardyń quramy týraly aqparatty qamtityn úkimettik sait qurý usynysyn jasady, dep habarlaidy QazAqparat.
«Ana retinde ekpeden keiingi asqyný jaǵdailaryn zertteýge kóp ýaqyt jumsaimyz. Osy oraida ekpelerdiń quramyna qatysty aldyn ala aqparattandyrý sharalary bolýy tiis. Sebebi, biz bul taqyrypty zertteý máselesimen kóp ainalysamyz», - dedi S. Fortýna Qazaqstandaǵy mindetti ekpe máselesin talqylaýǵa arnalǵan onlain konferentsiiada.
«Bul baǵyttaǵy usynystar aiasynda úkimettik sait qurý kerektigin alǵa tartamyz. Onda vaktsinalarǵa qatysty barlyq túsiniktemeler, bolýy múmkin asqyný jaǵdailary, ekpeniń tiimdiligine bailanysty zertteýler qamtylǵan jón», - dedi ol.
Onyń paiymynsha, bul sharalar ekpeler jaiynda tolyq aqparat alýǵa múmkindik beredi.
Konferentsiia barysynda Densaýlyq saqtaý vitse-ministri Liýdmila Biýrabekova statistikalyq málimetterge toqtaldy.
«Vaktsinalaý infektsiialyq aýrýlardan qorǵanýdyń tiimdi ádisi bolyp otyr. Dúniejúzilik densaýlyq saqtaý uiymy málimetinshe, ekpe jasaý jyl saiyn 3 mln-nan adamnyń ómirin qorǵaidy», - dedi Liýdmila Biýrabekova.
