Foto: TSM
Qazaqstanǵa resmi saparmen Birikken kúres álemi (UWW) uiymynyń prezidenti Nenad Lalovich jáne UWW Asia uiymynyń prezidenti Mohammed ál-Avamle keldi, dep habarlaidy Ult.kz.
Sapar aiasynda Qazaqstan Kúres federatsiiasy men United World Wrestling arasynda yntymaqtastyq týraly memorandýmǵa qol qoiyldy. Qujat elimizde sportshylardy joǵary deńgeide daiarlaityn, UWW tarapy tanyǵan Kúres akademiiasyn ashýdy kózdeidi.
Akademiia grek-rim, erkin, áielder jáne jaǵajai kúresi boiynsha balýandardy daiarlaityn zamanaýi ortalyqqa ainalady. Sonymen qatar quramynda jattyǵý úderisin keshendi qamtamasyz etetin meditsinalyq jáne sporttyq-ǵylymi zerthanalar ashý josparlanyp otyr.
Sapar barysynda UWW prezidenti Nenad Lalovich pen Qazaqstan kúres federatsiiasynyń prezidenti Erkin Oqasov Federatsiianyń jańa keńsesiniń ashylý rásimine qatysty. Keńse quramynda Qazaqstan kúresiniń bai tarihyna arnalǵan arnaiy Dańq zaly ashyldy. Munda otandyq sportshylardyń Olimpiada men álem chempionattaryndaǵy jetistikterin aiǵaqtaityn biregei jádigerler, sonyń ishinde medaldar, belbeýler, sporttyq kiimder, fotomaterialdar jáne chempiondardyń jeke muraǵattary qoiylǵan.
Halyqaralyq federatsiia ókilderi Qazaqstandaǵy kúrestiń damý qarqynyna joǵary baǵa berip, yntymaqtastyqty odan ári nyǵaitýǵa daiyn ekenderin bildirdi.
Sapar aiasynda sheteldik qonaqtarǵa Astana qalasyndaǵy negizgi sport nysandary, sonyń ishinde Jaqsylyq Úshkempirov atyndaǵy Jekpe-jek saraiy men «Barys Arena», sondai-aq Almaty qalasynyń sport nysandary tanystyryldy.
