Qazaqstanda simptomsyz koronavirýspen aýrǵandardy esepke alatyn top quryldy. Bul týraly «Ulttyq ǵylymi kardiohirýrgiia ortalyǵy» AQ basqarmasy tóraǵasynyń birinshi orynbasary Mahabbat Bekbosynova aitty, dep habarlaidy QazAqparat.
«Álemdik statistikaǵa sáikes, infektsiia juqtyrǵandardyń shamamen 80 paiyzy simptomsyz patsientter, iaǵni, eshqandai simptomdy sezinbeitin adamdar qurap otyr. Búginde búkil elimiz boiynsha 465 utqyr top qurylǵan. Amýblatorlyq býynnyń utqyr toby mindetine simptomsyz, aýrýdyń jeńil túri bar patsientterdi tolyqtai esepke alý kiredi», - dedi ol.
Onyń atap ótýinshe, qazirgi ýaqytta meditsinada simptomsyz koronavirýs infektsiiasy ókpe qabynýynyń jeńil túri jáne ókpeniń qabyndaý jeńil túri dep ekige bólinedi. Ókpe qabynýynyń jeńil túri kezinde ókpeniń zaqymdanǵan aýmaǵy 30 paiyzǵa deiin jetedi jáne ony kompiýterlik tomografiia kómegimen anyqtaýǵa bolady. Ókpe qabynýy júrek-qan tamyry júiesi, qant diabeti, semizdik syndy sozylmaly aýrýlary bar patsientterde kezdesedi.
«Olar endokrinologtarmen keńesýi qajet. Biz olarmen jumys tobyn qurý úshin kelissóz júrgizip jatyrmyz. Onyń quramyna aýrýdyń aýyr túrine shaldyqqan patsientterge keńes berý úshin endokrinolog, kardiolog, pýlmonolog jáne ambýlatorlyq býynnyń ózge de baǵyttarynyń mamandary kiredi», - dedi Mahabbat Bekbosynova.
