© Sputnik / Abzal Kaliev
Búgin Qazaqstanda jaratylystaný-matematikalyq baǵyttaǵy pánder boiynsha HIV Prezidenttik olimpiadanyń respýblikalyq kezeńi bastaldy, dep habarlaidy "Ult aqparat" BǴM baspasóz qyzmetine silteme jasap.
Biyl ministrlik pen otandyq joǵary oqý oryndary arasynda qol jetkizilgen ýaǵdalastyqtyń nátijesinde jeńimpazdar joǵary oqý oryndarynda oqýǵa arnalǵan bilim berý granttaryn jeńip ala alady.
Qorytyndy kezeń E.A. Bóketov atyndaǵy Qaraǵandy ýniversiteti bazasynda ótip jatyr. Olimpiada 15 qarasha bastalyp, 18 qarashaǵa deiin jalǵaspaq. Ziiatkerlik baiqaýda elimizdiń barlyq óńirinen 182 oqýshy baq synaidy.
Aita keteiik, Prezidenttik olimpiadaǵa 11 (12) synyp oqýshylary qatysady. Olarǵa tórt pán boiynsha — matematika, fizika, himiia jáne biologiiadan tapsyrmalar beriledi.
«Biz oqýshylarymyzdy yntalandyrý jáne bolashaqta olar óz bilimderin halyqaralyq olimpiadalarda kórsete alýyna barynsha jaǵdai jasaý úshin ártúrli deńgeidegi (aýdandyq, qalalyq, oblystyq, respýblikalyq) olimpiadalardy daiyndap, ótkizemiz. Prezidenttik olimpiada úsh kezeńde ótedi. Atap aitsaq, aimaqtyq, irikteý jáne respýblikalyq kezeń. Prezidenttik olimpiadanyń birinshi (óńirlik) kezeńi qyrkúiek aiynda ótti, oǵan respýblikanyń barlyq óńirinen 3 myńnan astam oqýshy qatysty. Ekinshi kezeńge 396 oqýshy ótti. Irikteý kezeńi 22 qazanda bir mezgilde barlyq oblys ortalyǵynda jáne respýblikalyq mańyzy bar qalalarda uiymdastyryldy. Osylaisha, qorytyndy respýblikalyq kezeńge 182 oqýshy irikteldi. Prezidenttik olimpiadanyń jeńimpazdary men júldegerleri QR BǴM-niń I, II jáne III dárejeli diplomdarymen jáne medaldarmen marapattalady. Sondai-aq biz olimpiada jeńimpazdary úshin bilim granttaryn bólýge daiyn ekendikterin bildirgen birneshe joǵary oqý ornymen kelisimge qol jetkizdik», — dep atap ótti «Daryn» respýblikalyq ǵylymi-praktikalyq ortalyǵynyń direktory Timýr Nurkeshov.
Prezidenttik olimpiadaǵa qatysýshylardyń jumysyn halyqaralyq olimpiadalardyń jeńimpazdary jáne júldegerleri, Qazaqstannyń jetekshi joǵary oqý oryndarynyń PhD doktorlary baǵalaityn bolady. Barynsha ashyqtyqty qamtamasyz etý úshin konkýrs onlain túrde kórsetiledi. Beinetransliatsiiaǵa siltemeler http://daryn.kz «Daryn» RǴPO akkaýnttarynda usynylady.
Esterińizge sala keteiik, jaratylystaný-matematikalyq baǵyttaǵy pánder boiynsha Prezidenttik olimpiada 2008 jyldan beri ótkizilip keledi.
«Daryn» ortalyǵy jyl saiyn ótkizetin ziiatkerlik baiqaý elimiz boiynsha daryndy oqýshylardy anyqtaýǵa jáne olardyń áleýetin iske asyrý barysynda qoldaý kórsetýge kómektesedi.
