Qazaqstanda aldaǵy oqý jylynda oqýshylarǵa mektep formasyn kiiý mindettelmeitin bolady. Bul týraly Bilim jáne ǵylym ministri Ashat Aimaǵambetov málim etti, dep habarlaidy QazAqparat.
«Mektep formasy túsiniginiń ózi, onyń qaǵidaty men talaptary eshqaida joǵalyp ketpeidi. Biraq biz bul buiryqqa arnaiy tarmaq engizemiz. Iaǵni ol tarmaqqa tótenshe jaǵdai, karantin, shekteý sharalary men basqa da fors-major jaǵdailar jatady. Dál osyndai jaǵdailarda balalarǵa klassikalyq iskerlik kiimmen kelýge ruqsat beremiz», - dedi Ashat Aimaǵambetov Bilim jáne ǵylym ministrliginiń onlain formattaǵy tilshilermen kezdesýinde.
Onyń aitýynsha eger ata-analarda qazirgi ýaqytat mektep formasyn alýǵa jaǵdaiy bolmasa balalarǵa qarapaiym klassikalyq kiim alyp berýge bolady.
«Mundai sheshimdi biz qabyldadyq. Qazirgi jaǵdaida bul sheshimniń mańyzy zor dep esepteimiz. Muny keńes sipatynda emes, Bilim jáne ǵylym ministrliginiń ádilet organdarynda tirkegen buiryǵy negizinde júrgizip jatyrmyz. Sheshimniń normativti-quqyqtyq qujat retinde sipaty bolýy kerek», - dedi ol.
Ashat Aimaǵambetov dese de bul ózgeris ýaqytsha ekenin eskertti.
Eske sala ketsek Prezident Qasym-Jomart Toqaev Úkimettiń keńeitilgen otyrysynda mektepterdiń aldaǵy jańa oqý jylyna daiyndyǵyn pysyqtaǵan bolatyn.
«Bul – ákimdikter men ministrliktiń jumysynyń nátijesi. Ákimdikter jańa oqý jylyna dereý daiyndalyp, mektepter men jekelegen muqtaj otbasylardy qajetti tehnikamen jabdyqtaýǵa tiis. 1 qyrkúiekte jańa oqý jyly bastalady. Ministrliktiń bul oqiǵaǵa daiyndyǵyna kúmánim bar. Balalar qalai oqidy – mektepte nemese qashyqta? Muǵalimderdiń jańa oqý jylyna daiyndyǵy qandai?», - dep suraq qoidy Memleket basshysy.
