Foto: QR DSM
Qazaqstan Premer-Ministri Oljas Bektenov Májilis depýtaty Nurgúl Taýdyń meditsinalyq týrizmge qatysty depýtattyq saýalyna jaýap berdi, dep habarlaidy Ult.kz.
Úkimet basshysynyń aitýynsha, 2025 jyldyń basynan beri elimizde shamamen 1,5 myń sheteldik azamat otandyq klinikalarda em alǵan. Bul kórsetkish Qazaqstannyń halyqaralyq meditsinalyq baǵyt retindegi tartymdylyǵynyń artyp kele jatqanyn kórsetedi.
Qazirgi tańda 48 eldiń azamattary elimizdiń klinikalaryna elektrondy viza (E-Visa) júiesi arqyly ońai kire alady.
Oljas Bektenov óz jaýabynda meditsinalyq týrizm salasyn damytýǵa arnalǵan jańa zań jobasy ázirlenip jatqanyn atap ótti. Bul qujat sheteldik patsientterdi tartýǵa jáne meditsinalyq qyzmet eksportyn ilgeriletýge baǵyttalǵan.
Májilis depýtaty Nurgúl Taý óz saýalynda meditsinalyq týrizmniń biryńǵai operatoryn qurýdy usynǵan bolatyn. Ol operator klinikalar men týroperatorlar arasyndaǵy bailanysty úilestirip, sheteldik naýqastarǵa yńǵaily servistik jaǵdai jasaýy tiis dep sanaidy.
«Eger biz Qazaqstandy sheteldik patsientter úshin tartymdy baǵytqa ainaldyrǵymyz kelse, túsinikti ári yńǵaily mehanizm qajet. Biryńǵai operator qazaqstandyq meditsinanyń brendin ilgeriletýmen jáne joǵary sapaly standarttardy qamtamasyz etýmen ainalysýy kerek», — dedi Nurgúl Taý.
Depýtattyń pikirinshe, meditsinalyq týrizmdi damytý tek ekonomikalyq paida ákelip qana qoimai, qazaqstandyq meditsinanyń sapasyn jáne dárigerlerdiń kásibi deńgeiin halyqaralyq deńgeide tanytýǵa múmkindik beredi.
