QR Indýstriia jáne infraqurylymdyq damý ministri Beibit Atamqulov halyqaralyq áýe reisteriniń qalai jandanatynyn túsindirdi, dep habarlaidy QazAqparat.
«Koronavirýs infektsiiasyn taratpaý týraly Vedomstvoaralyq komissiia jaqynda ǵana jinalys ótkizip, 1 maýsymnan bastap, úsh memleketke áýe reisterin jandandyrý máselelerin qarastyrýǵa ruqsat berdi. Olar – Ońtústik Koreia, Qytai jáne Ázerbaijan. Nege bul elder tańdalyp alyndy? Birinshiden, COVID-19 boiynsha ondaǵy ahýalǵa baǵa berildi. COVID-19 boiynsha halyqaralyq reiting bar jáne atalǵan úsh memleket barynsha qaýipsiz elder qatarynda», - dep túsindirdi spiker Ortalyq kommýnikatsiialar qyzmetinde ótken esep berý brifinginde.
Onyń aitýynsha, ekinshi kezeńde Germaniia, BAÁ, Chehiia men Tailandqa reis jandandyrý qarastyrylady.
«Polsha men Majarstanǵa da ruqsat alyp qalýymyz múmkin. Óitkeni, onda da qaýipsizdik deńgeii aitarlyqtai joǵary. Ekinshi kezeń shamamen 15 maýsymnan keiin qolǵa alynady. Sheteldegi áriptesterimmen únemi bailanysta otyramyn. Túrkiianyń kólik ministrimen sóileskenimde, olardyń Antaliiaǵa reis ashýǵa múddeli ekenin, 20 maýsymdy arnaiy belgilep otyrǵandaryn aitty. Bul jumystardy áli de pysyqtaimyz», - dedi B. Atamqulov.
