Foto: Lovepik
Búgingi tańda áielder kásipkerligi ekonomika ósýiniń negizgi núktesiniń biri. 2025 jyly Qazaqstanda bir millionnan astam áiel shaǵyn jáne orta biznesti basqarýda. Bul shaǵyn jáne orta kásipkerlik sýbektileriniń 48,1%-y, dep habarlaidy Ult.kz Ekonomika ministrligine silteme jasap.
Áielder saýdany, qyzmetterdi, sulýlyq indýstriiasyn, qoǵamdyq tamaqtanýdy, bilim berý jobalaryn, sondai-aq ekologiialyq jáne áleýmettik bastamalardy batyl damytýda. Olar óńir ekonomikasyn nyǵaita ári zamanaýi damý trendin qoldai otyryp, turaqty, tehnologiialyq jáne qoǵamdastyqqa baǵyttalǵan kásiporyndar qurýda.
Búgingi tańda áielder kásipkerligin qoldaý úshin tórt negizgi qural bar.
Birinshisi — aqparattyq-konsýltatsiialyq kómek. Áielder negizgi suraqtarǵa jaýap alady: biznesti qalai tirkeý, EQJJ tańdaý, qujat resimdeý, memlekettik qoldaýdy paidalaný jáne tenderlerge qatysý. 2026 jylǵy 1 qańtarda 16 326 áielge 60 249 qyzmet kórsetildi.
Ekinshisi — jumys istep turǵan biznesti servistik qoldaý. Bul býhgalterlik esep, salyq, eseptilik, "1S", biznes-jospar men ilgeriletý strategiiasyn ázirleý. Barlyǵy 6 410 áielge 7 106 qyzmet usynyldy.
Úshinshi qural — "Iskerlik bailanystar". Kásipkerler sheteldik áriptestermen bailanys ornatyp. shetelde taǵylymdamadan ótedi. Baǵdarlamany 36 kásipker, onyń ishinde 10 áiel aiaqtady.
Tórtinshi qural — jergilikti óndirýshilerdiń áleýetin ashýǵa kómektesetin jáne aýyldyq jerdiń ekonomikalyq damýyn kúsheitetin "Bir aýyl-bir ónim" jobasy. Búgingi tańda qatysýshylardyń 90%-y áielder. 1 myńnan astam qatysýshy keńes alsa, onyń ishinde 742-si áiel. 38-i finalist atandy. Joba 5 mln teńgege deiin memlekettik grant alýǵa jáne oqytýda, brendingte jáne ónimdi jyljytýǵa qoldaý alýǵa múmkindik beredi.
Taǵy bir baǵyt — EQDB-men birlesken "Biznestegi áielder " baǵdarlamasy. 2015 jyldan bastap 565 konsaltingtik jáne koýchingtik joba ótkizilgen. Qazaqstannyń túkpir-túkpirindegi 10 myńǵa jýyq kásipker "Mikrobiznestegi áielder” bes modýldi onlain baǵdarlamasyna qatysty.
