Qazaqstanda qashyqtan oqytýdy resmi túrde tanylǵan bilim berý formasynyń qataryna qosý usynyldy, dep habarlaidy QazAqparat.
Bul usynysty Ulttyq qoǵamdyq senim keńesiniń múshesi Raýan Kenjehanuly aitty.
«Bilim berýdiń sapasyn arttyryp, ári ony bar aimaqta qoljetimdi etý úshin qashyqtan jáne onlain oqytý tehnologiialaryn júieli túrde jáne keńinen engizý suranyp tur. Sońǵy 10 jylda álem boiynsha qarqyndy damyǵan bul tehnologiialar óz tiimdiligin dáleldedi. Ásirese, jahandyq karantin saldarynan jappai qashyqtan oqytýǵa kóshý bul ádisterdiń zor múmkindikterin kórsetti. Árine, mektep jáne kolledjderdi, JOO-ny tolyq onlainǵa ótkizý mindeti turǵan joq. Bul múmkin de emes», - dep atap ótti spiker Ulttyq qoǵamdyq senim keńesiniń onlain formattaǵy 3-otyrysynda.
Degenmen, ár oqýshynyń jeke qabileti men múmkindikterin eskere alatyn, sol arqyly oqytýdyń tiimdiligin arttyratyn tehnologiialardy bilim berýge qazirdiń ózinde engizýge bolady.
«Ol úshin aldymen qashyqtan oqytýdy Qazaqstanda resmi túrde tanylǵan bilim berý formasy qataryna qosyp, ony Bilim týraly zańǵa kirgizý qajet dep oilaimyz. Qashyqtan oqytý tehnologiiasyn qoldanatyn oqý oryndaryna qoiylatyn ádistemelik jáne tehnologiialyq talaptardy aiqyndap, olarǵa bólek litsenziia bergen abzal. Bul másele shuǵyl sheshilmese, óz elinde otyryp, sheteldik oqý platformalaryn tańdaityn qazaqstandyq qashyqtan oqýshylar kóbeiedi. Qazirdiń ózinde bizdiń esebimizshe 30 myńnan astam qazaqstandyq oqýshylar ien stýdentter qazaqstandyq baǵdarlama, standart pen talapty múldem eskermeitin sheteldik onlain mektep pen ýniversitetterde oqyp jatyr. Bul máselege qatysty usynystar men zańǵa enýi qajet tolyqtyrýlar men ózgerister jobasyn ministrlikke tapsyrdyq», - dedi R. Kenjehanuly.
