QR Saýda jáne integratsiia ministri Baqyt Sultanov Qazaqstanda kartoptyń ne sebepti qymbattaǵanyn túsindirdi, dep habarlaidy QazAqparat.
«Kartop boiynsha Aýyl sharýashylyǵy ministrliginiń málimetterine sáikes otandyq óndiris ishki tutynýdy 108%-ten astam qamtamasyz etedi. Sonymen qatar, kartoptyń taýarlyq óndirisiniń kólemi bar bolǵany 2 mln tonnany nemese jalpy túsimniń 47%-tin quraidy. Qalǵan kólemi taýar ainalymynda júieli túrde qatyspaidy. Ol halyqtyń jeke qosalqy sharýashylyqtarynda óndiriledi», - dedi Saýda ministri búgingi Úkimet otyrysynda.
Onyń aitýynsha, ótken jyly eksport 360 myń tonna kóleminde rekordqa jetken. Osylaisha, kartop eksportynyń úlesi 19%-ti quraidy, bul naryq tapshylyǵyna ákeledi.
«Osyǵan orai, maýsymaralyq ýaqytta kartopty importtaý qajettiligi týyndaidy. Bul jaǵdai jyldan jylǵa qaitalanyp keledi. Biraq osy máseleni basqaryp júieli sheshimderdi tabýǵa Aýyl sharýashylyǵy ministrligi shaqyrǵanymen jergilikti atqarýshy organdar atalǵan problemany joiý boiynsha tiisti sharalar qabyldamaidy. Ótken jyly kartop eksportyna tyiym salý arqyly ǵana baǵa turaqtandyryldy. Biyl tómen baǵamen eksporttalǵan (69 myń tonna) otandyq ónim qorlardyń 3 ese qysqarýyna (903 myń tonnadan 330 myń tonnaǵa deiin) áser etken», - deidi Baqyt Sultanov.
Atalǵan kezeńdegi teńgerimsizdikti toltyrý úshin Iran men Pákistannan 28 myń tonna qymbat importtyq kartop satyp alyndy. Bul otandyq kartopqa qaraǵanda úsh ese qymbat.
«Jalpy, biylǵy 4 aida kartop importy ótken jyldyń sáikes kezeńimen salystyrǵanda 67 ese ósti, al jyl basynan beri import baǵasy 47%-ke joǵarylady. Bul rette ákimdikter barlyq qajetti tetikteri bolsa da, halyqty qamtamasyz etý úshin ishki naryqta kartopty ustai almady. Atap aitqanda, sýbsidiialaý kezinde óndirýshilerge «qarsy mindettemeler» qoiylmaǵan. Óńirlik turaqtandyrý qorlaryna kartop jetkilikti kólemde satyp alynbady, sondai-aq forvardtyq satyp alý jáne «ainalym shemasy» siiaqty naryqtyq tetikter tolyq paidalanylmady. Aimaqtardyń turaqtandyrý qorlarynda qazirgi ýaqytta kartop qory is júzinde joq», - dedi Baqyt Sultanov.
Saýda ministri Úkimet basshysynan qysqa merzimde Aýyl sharýashylyǵy ministrligine Saýda jáne integratsiia ministrligimen birlesip, azyq-túlik taýarlaryn óndirý men tutynýdyń boljamdy teńgerimin ázirleý týraly tapsyrma berýdi surady.
«Bul baǵanyń ósý táýekelderin der kezinde anyqtaýǵa jáne baǵany turaqtandyrý boiynsha aldyn alý sharalaryn ýaqytyly engizýge múmkindik beredi. Sondai-aq, qazirdiń ózinde jergilikti atqarýshy organdar AShM jetekshiligimen aýyl sharýashylyǵy óndirýshilerin sýbsidiialaý sheńberinde ishki naryqty birinshi kezekte ónimmen qamtamasyz etý boiynsha qarsy mindettemeler qoiýy qajet», - dedi Baqyt Sultanov.
