Foto: pixabay.com
Qazaqstanda keiingi bes jylda kámelet jasyna tolmai turmysqa shyqqan qyzdardyń sany ósken, dep habarlaidy «Ult aqparat» 31-arnanyń “Informbiýro” jańalyqtar baǵdarlamasyna silteme jasap.
Mysaly, 2019 jyly 16-18 jas aralyǵyndaǵy 7 406 burymdy turmysqa shyqqan eken. Al 2022 jyly 8 502 boijetken kelin atanǵan.
Statistikalyq derekterge sáikes, turmysqa erte shyǵatyndar ásirese Túrkistan, Jambyl jáne Almaty óńirlerinde kóp. Máselen, byltyr Túrkistanda 1 332, Jambylda 886, Almaty oblysynda 688 qyz 18 jasqa tolmai jatyp kúieýge tiip úlgergen.
Zańger Baǵdat Amandosulynyń aitýynsha, elimizde osyndai jaittar zańnyń shikiliginen bolyp jatyr.
“Neke jáne otbasy týraly kodekste naqty neke jasy kórsetilgen. Ol 18 jastan bastalady. Alaida zań 18 jasty tómendetýge júktilik bolsa, ortaq bala bolsa ata-analardyń kelisimimen kámeletke tolmaǵandarǵa nekelesýge ruqsat beredi. Osy zańnyń shikiligi qoǵamdy alańdatyp otyr. Elimizde 18-ge tolmaiynsha turmys qurýǵa bolmaidy degen naqty tyiym salý kerek. Eger kámeletke tolmaǵandar otaý qursa, onda olardyń zańdy ókilderin jaýapkershilikke tartý kerek. Sebebi kámeletke tolmaǵandardyń áreket qabilettigi tolyq bolmaidy. Eger qyzdyń kámeletke tolmaǵanyn er adam bilse, onda qylmystyq jaýapkershilik qarastyrylady. 3 jyldan 6 jyl aralyǵynda bas bostandyǵynan aiyrylady”, – dedi zańger.
